Salute,

Quando io ha visitate amicos in Anglaterra io ha le experientia que il
es multo difficile a conversar super p. ex. aves e arbores si non ambe
partes sape le nomines scientific. Io sape plure nomines in anglese de
arbores e aves ma quando on parla con laicos le difficultates remane. Io
ha indicate a un certe ave e questionate: Que tu nomina iste ave? Io
sovente recipe le responsa: Blackbird, anque si il se tracta del aves
multo differente. In mi dictionario: en. blackbird es sv. koltrast e la.
Turdus merula.

Le scientista svedese Carl von Linné (Carolus Linnaeus) 1707-78 es ben
cognoscite de su grande obras Systema Naturae e Species Plantarum in le
mundo e su systema taxonomic re plantas es ancora usate. Ma un nove
systema es introducite nunc que es fundate al affintate inter herbas in
le processo del evolution. Nonobstante Linnaeus ha habite un grande
influentia in le scholas svedese. In mi juventute cata alumno esseva
obligate a colliger un certe numero de herbas e los siccar e inglutinar
in un herbario. Le instructores de biologia ha controllate iste
herbarios e iste procedura esseva normal usque a tempores plus tarde.

Pro me personalmente le studios de herbas in le schola esseva bon pro mi
education professional plus tarde. Ma io sovente ha observate que plure
svedeses pote dicer un nomine latin de un herba ma sape nil del objecto.
Nomines non es cognoscentia!

Postea io ha pensate re iste "hereditage grave" de Linnaeus pro le
alumnos svedese e ha le reflexion que on non in nostre scholas habeva
valorate cognoscentia de astronomia in le mesme maniera. Le majoritate
del svedeses es "analphabetos" re le stellas observabile. Remarcabile -
isto ha essite un del plus importante observationes e discussiones desde
le juventute del humanitate!

Linnaeus ha scribite plure contos de su viages e ille contos es
reguardate como exemplos brillante in le literatura belletristic del
lingua svedese. Io ha legite plure de illos e io es multo fascinate de
su habilitate a observar e describer - etimam phenomenos folkloristic.

Jan

--
Jan Årmann/Jan Armann
Generalsgatan 12 E; S-903 36 UMEÅ/UMEA, Sverige (Sweden)
Tel: +46 (0)90771525; Summer/Estate +46(0)52521485
Mobilphone: +46(0)706594934
Voce messages (multo curte) e fax: +46 (0)902034845
e-mail: [log in to unmask]; reserva: [log in to unmask];
ICQ - UIN nr:785745;
http://www.algonet.se/~armann