Un altere traduction...

===================================================================
Angela habeva circa vinti annos; illa pareva plus vetule a causa
del disveloppamento del proportiones. Grande, carnose, sanguinee e
focose, illa era un de aquelle exemplares excessive del sexo que
pare conformate expressemente pro esser sposas del multitude --
protestos revolutionari contra le monopolio del lecto conjugal.

(...)

Consciente de su beltate, Angela abusava.

(...) Illa comenciava con un joco de virtute. Illa essugava con
aere de serietate le labios humide; le palpebras, de longe cilios,
bassava super le oculos, super le facie, visiera impenetrabile del
pudor. Illa invitava al adoration, colligente al humeros le manto
de candor, refugiante se in le indifferentia hieratic del vestales.
Depost, un punctetta de ingenue surriso, oculos claudite ancora;
gradation de infantilitate que substitueva le vestal per un infante
fugitive e timide, ridente, volvente le facie. (...) Usque al
momento que, subito, (...) aquelle virtute, aquelle blanditate,
aquelle fugitive pudor, (...) aquelle physiognomia honeste, lugubre
forsan a causa de esser amabile, se findeva in duo pares de porta
magic e rotava in explosion le sabbat del lascivitates.

Le oculos rideva, distillante un lacrima de desiro; le narinas
anhelava (...); le labios, animate per convulsiones tetanic,
balbutiava defias, promittente submission de can femina e le dulcor
del sonios oriental. Illa dominava alora per le offerta abusive,
subito; illa se abatteva al definitive humiliation, pro attraher de
basso, como le vertigines. Ecce la jacente a terra, le prostitution
del vestal, le hymeneo del donzella, le corruption del innocente,
tres servilismos reclamante un domino; appetito, appetito pro iste
orgia rar sin convivas!
===================================================================
Raul Pompéia, "O Ateneu" ["Le Atheneo"].

A revider,
Ensjo.