Traduction de http://redeglobo1.globo.com/jn/semana.jsp?id=03583&mais=1
LE EURO INVADE GRANDE BRITANNIA
Le prime ministro britannic ha facite hodie (2002-01-03) un declaration in
defensa del euro. Tony Blair ha affirmate que le britannicos serea "multe
naive" si illes non adoptarea le moneta unic.
Tres dies ha essite sufficiente pro que Anglaterra se rendeva al
inevitabile. Officialmente le pais es distante del nove moneta, mais in le
stratas le euro ja es parte del vita del angleses.
In un mercato de artisanato, un del maxime attractiones touristic de
London, le commerciantes ja ha date le benvenita al euro. Illes vole
facilitar le compras pro le estranieros e, naturalmente, stimular le
venditas ancora debilitate per le attentatos de 11 de septembre.
Un cursa de taxi del aeroporto al citate costa le duplo del precio de un
billet de avion a Geneva. Un simple caffe costa circa 3 EUR. Un spica de
maiz vendite in le medio del strata, circa 4 EUR. Pro le tourista
estranier, il es le terror del precios alte que abatte le venditas in le
pais, que es un del plus car del mundo.
Con le libra supervalutate, le quarte maxime potentia economic del planeta
ha entrate 10 annos retro in le Union Europee. Mais per decision del
governamento conservator anterior, in relation al euro illo ha adoptate le
commode postura de observator. Primo illo vole evalutar le comportamento
del economia, supertoto post le adhesion del assi-nominate paises povre del
est europee, programmate pro le proxime duo annos.
"Personalmente io non vole le euro. Anglaterra es un insula independente.
Illo es parte de Europa, mais illo non es Europa", dice un anglese.
Le pais dividite -- 52% es contra le euro -- mantene le prime ministro Tony
Blair in prudentia. In le retroscena, se specula que ille ja haberea
ordinate que le Banca Central anglese travalia a velocitate maxime pro
producer nove milliardos [9.000.000.000] in notas de euro. Mais pro le
publico, ille dice que va esser bon pro le pais anticipar le plebiscito
programmate pro 2003.
In le centro commercial de London il ha varie evidentias que, pro le prime
vice in le historia moderne, Anglaterra accepta un moneta parallel. Un
placard in un del magazines plus traditional avisa que le euro es acceptate
pro le compras. E le magazin ha sempre refusate le dollar o qualcunque
moneta estranier.
Le interprisas que presta servicios basic ja ha avisate que illos va
acceptar le pagamento del facturas in euro. Le interprisas telephonic se
hasta pro offerer, in le proxime dies, cabinas public que permitte
telephonatas con le nove moneta, valide equalmente pro le compra del
billets pro museos e tote le attractiones touristc del Regno Unite.
Mais pro le plus conservatores le limites ancora es assatis clar. Le ultime
sondage de opinion informa que le regina Elizabeth ha un grande prestigio,
illa es reguardate como un fidel defensor del pais. E illa ja ha dicite:
"Le euro non va entrar in le palacio de Buckingham tanto immediatemente".
Ancora il es multo precoce facer un evalutation consistende del euro. Mais
mesmo in le Regno Unite, ubi se expectava un grande resistentia, le
indicios es positive. Le unic protesto usque a iste momento ha reunite
minus de 12 personas pro decretar le morte del prime moneta del mundo
globalizate.
Un homine non identificate ha essite arrestate in Germania quando ille
tentava pagar le factura in un bar con un nota false de 20 euros.
~~~
Inviate equalmente al gruppos de novas europa.novas e europa.union.euro.
Visita e participa:
http://groups.google.com/groups?hl=ia&group=europa
(Le messages pote tardar in apparer in le interfacie via web de Google.)
Tote le linguas europee (includente Interlingua!) es acceptabile.
A revider,
Ensjo.
|
