Le Natal in Belém do Pará, Norte de Brasil

(Redigite per mi sposa Rosana Matos -- "Zjan" -- e traducite per 
me in Rio de Janeiro.)


Le "climate" de Natal comencia in novembre con botecas e casas e 
stratas decorate con adornos colorate e lumines, le botecas 
comencia a devenir plen de gente pro le compra del presentes. Le 
supermercatos ja annuncia le fructos del epocha del Natal; 
aquelle fructos que non es native de Brasil, mais que non pote 
mancar in le cena, il es tradition. Ah! Le castanias portugese!

Le climate equalmente comencia a cambiar in Belém. Comencia a 
cader aquelle pluviettas fin, frigide, que dura alcun horas. Le 
temperatura remane inter 23 e 32°C. Un climate assatis 
agradabile pro nos residentes de Belém. Frigidetto de Natal. 
Proque Belém se situa multo al nord de Brasil, isto es, assatis 
proxime al linea del Equator, nos non ha quatro stationes del 
anno, mais plus tosto duo, un con multe pluvia e pauc sol e 
altere con pauc pluvia e multe sol.

In decembre, le cursa in cerca del presentes augmenta e in 
determinate horas, le areas commercial e le centros de compras 
es invadite per multitudes de Papas-Natal. Equalmente es un 
epocha de multe festas de confraternizationes: inter collegas de 
travalio, de football, de hydrogymnastica, del amicos e del 
familia. Mille festas de excambio de presente in un schema 
cognite como "amico invisibile".

Altere grande movimento in le epocha del Natal es le donationes 
a personas carente. Invariabilemente, nos es involvite in alcun 
adjuta pro le compra de joculos, vestimentos, "corbes de Natal" 
pro le personas carente, tanto in districtos e communitates 
paupere de Belém, como in le "interior" del stato (le areas plus 
distante del capital), que a vices non mesmo pote commemorar le 
Natal.

Le commemoration es realizate al die ante le Natal, le die 24 de 
decembre. Le personas arrangia le casa, prepara copiose cenas e 
reuni le familia e le amicos pro le excambio de presentes e plus 
un "amico invisibile". Es un die de festa. Le sensation in tote 
le partes del citate es aquelle que antecede un grande festa.

De nocte, post visitar alcun casas de amicos e parentes, nos 
debe trovar tempore pro desirar Felice Natal a alcun personas 
special. Quando non es possibile ir -- paupere telephono! Es 
commun congestionamentos in le lineas telephonic, principalmente 
a altere statos. Le personas debe telephonar in aquelle mesme 
nocte.

A partir de circa dece horas del nocte comencia le cena, multe 
fructos, multe gallos de India, multe gado, "canapés", tortas, 
panettones, bibitas gasose, alcun vino e multe champagne. Le 
cena de Natal es importantissime.

Post deliciar se con medietate del cena, circa le medie-nocte, 
le personas excambia presentes. Se excambia le presentes 
comprate pro le parentes e amicos, e se excambia le presente 
de "amico invisibile". Generalmente uno face jocos pro que le 
alteres discoperi qui es su "amico invisibile". Post tote le 
jocos, arriva le hora de fruer del altere medietate del cena.

In le die sequente, die 25 de decembre, tu pote ir al placias 
que non se videra altere cosa que infantes con su joculos 
apportate per Papa Natal durante le nocte. Le prandio ja es 
garantite, proque illo sera tote aquello que ha restate del cena 
e plus gallo de India e plus gado.

E le die 26 de decembre comencia le preparationes pro le festa 
de Anno Nove, que es como un altere Natal, ancora plus animate.

~~~

Salutes desde Rio,
Ensjo.