Non es Arial ma le fonte Tahoma que es le standard de menus, "cortinas"
etc. in multe programmas computatorial. Le ration pro seliger lo es -
probabilemente - que illo es multo clar in grandores minimal, e isto es
necessari pro haber spatio pro toto. Il es, totevia, ver que il pote esser
difficile differentiar un I majuscule de un l minuscule, de facto isto es
impossibile.

Le grande uso de Arial in Internet es le desiro forte del constructores
del sitos de poter controlar lor aspecto graphic. Il ha multo poc fontes
que es identic in le ambiente Windows, in illo de Macintosh e in illo de
Linux. Pro isto Times New Roman e Verdana es fontes preferite, proque
illos es quasi le standard in cata installation. Arial es anque frequente.
Le problema es que si un constructor/designator de un pagina in Internet
selige un fonte, le visitator debe haber iste fonte sur su proprie
computator, alteremente le aspecto non essera monstrate, como le
designator lo pensava. Alora le computator in vice selige le fonte que -
secundo le machina - es le plus proxime, e le resultato non sempre es
belle...

Finalmente, on non pote immediatemente seliger le grandor in punctos (10,
12, 14, etc.), quando on face paginas pro Internet. Le codification HTML
ha sex grandores predefinite. Si on vermente desira laborar con detalios
del layout, on debe usar lo que se appella in anglese "Cascading Style
Sheets" (o CSS). Isto es como typographias predefinite in programmas de
processamento textual (WordPerfect, Word, OpenOffice etc.). Quando on
cambia le typographia, le aspecto cambiara in omne casos sur omne paginas,
ubi iste typographia ha essite usate. Isto face le uso de CSS multo
popular, proque il es facile controlar in detalio le aspecto graphic, e il
es multo facile cambiar un typographia e assi cambiar le aspecto de tote
le paginas.

Con mi optime salutes
Thomas Breinstrup