Car amicos,

In un message recente io ha stimulate interlinguistas de scriber in le foro
"Fenêtre sur l'Europe" in favor de interlingua. Le reaction de Thomas
Alexander me surprende in alte mesura, non solmente proque ille se monstra
un defensor de esperanto, ma super tote per su assertion que io non saperea
le factos.

Io sape que nostre lista Interlng non es le loco apte pro entrar in
discussion con Alexander. Forsan le coollist poterea esser un foro plus
adequate. Pro iste ration io non va essayar de refutar extensemente su
accusationes e reproches. Io va restringer me a solmente pauc punctos de su
message.

Que es le foro "Fenêtre sur l'Europe"? Reponsa breve: Illo es un foro que
vole informar e discuter super tote le questiones relative al nove Europa.
Un del problemas del Union Europee es le problema linguistic. Il va sin
dicer que un grande numerode  "Sujets" (capitulos) concerne iste problema. E
super iste terreno appare naturalmente le esperantistas, qui essaya de
dominar le thema. Felicemente il ha anque alteres qui propone e defende
interlingua e se oppone a esperanto e a altere "solutiones" irrealistic como
p.ex. solresol.

Desde le anno 1993, quando io ha discoperite le foro super Europa, io ha
participate in le discussion per plure decenas de messages. Que es lo que io
ha facite e que es lo io continua a facer?
Duo cosas. Brevemente dicite:
1. Io explica per longe argumentationes e multiple exemplos le qualitates de
interlingua, que rende iste lingua paneuropee extrememente apte pro funger
como lingua central in Europa. Io monstra le internationalitate e le grande
mesura de regularitate de interlingua.
2. Io refuta le attaccos del esperantistas, monstrante per longe
argumentationes e multiple exemplos proque io trova inapte esperanto como
lingua central de Europa. Vos pote retrovar iste messages in le archivos del
foro. Iste responsas al esperantistas es necessari, nam lectores sin
cognoscentia de esperantio poterea pensar que tote lo que le esperantistas
scribe, serea le veritate.

Alexander scribe: Esque il non es possibile defender interlingua sin
attaccar esperanto? Si, in general isto es possibile. Pro iste ration nos
non attacca esperanto, si le esperantistas non attacca interlingua. Vos pote
vider iste attitude in nostre revistas, in p.ex. "Panorama" e in "Voce de
Interlingua". Ma hic in le Foro de Europa le situation es differente. In
iste foro il ha plure esperantistas fanatic qui attacca sin interruption
interlingua e narra continuemente informationes false e semi-false e
semi-veritates super le movimento esperantistic e le lingua de Zamenhof. Lor
activitate exige replica e refutation.

Alexander tocca le thema del Projecto de Reforma de Zamenhof de 1894. Ille
scribe que io face errores factual. Io non lo crede, nam io ha haurite mi
informationes super iste historia ab le articulos que Zamenhof "himself" ha
scribite in le revista "La esperantisto" del annos novanta del 19e seculo.
On pote retrovar los anque in le scriptos publicate per Ric Berger,
obtenibile apud le Servicio de Libros UMI.

Alexander me reprocha ancora altere cosas. Pardona me que io non plus osa
prende le attention de plures inter vos. Si vos es vermente interessate in
le materia, io vos consilia de cercar in le archivos del foro "Fenêtre sur
l'Europe". Le adresse del sito es: www.fenetreeurope.com

Salutationes de
Piet Cleij