Kjell ha scribite
>Nunc ego non memora omne le detalios, ma il habeva in le historia un
>discussion de incontro del olim secretario del Universal
>Esperanto-Association, le secretario general e Gode. E si ego ben memora
>Lapenna non sentiva que ille era sufficiente basse in rango academic pro
>discuter con Gode (qui a ille tempore non era Doctor como Lapenna qui
>(si ego ben memora era professor!) e Gode qui non voleva discuter un
>lingua que non era le consequentia de un recerca academic! E intertanto
>humanos usava le duo linguas, cata uno, con su imaginationes del avan- e
>disavantages del linguas in question!
>
>Le historia ha certemente su punctos amusante!
>
>A vostre sanitate!

Mi memoria falle a vices equalmente.... :-)

Secundo Frank Esterhill in su "Interlingua Institute: A history"
Dr. Gode ha recipite su Ph.D. del Universitate Columbia in 1939 in
Studios Germanic.

Le proponite debatto inter Lapenna e Gode esseva intendite
pro occurrer in 1963. Le organizator del debatto esseva Frank Hardin,
le redactor del International Language Review.  Dr. Gode habeva
presentate un defia a Lapenna a debatter le personalmente. Totevia
le subjecto del debatto proponite per Gode non esseva de un comparation
grammatic e lexic de iste duo linguas. Gode habeva dicite (tote
iste correspondentia appareva in le International Language Review
de april-junio 1963): "Iste proposition [de Lapenna a debatter le
meritos relative de esperanto e interlingua] sembla indicar que
mi defia original non esseva sufficientemente clar pro Dr. Lapenna pro
comprender que io ha necun interesse de toto in discuter le meritos
comparative de esperanto e interlingua. De facto, io esseva
motivate in defiar Dr. Lapenna exclusivemente per le sperantia
que un debatto inter ille e me resultarea, al beneficio del pace
in le mundo, in le intendimento final del gentes (includente le
esperantistas e le interlinguaistas e mortales ordinari) que
interlingua e esperanto non pote esser comparate e que le areas
in que on pote imaginar que illes pote collider es vermente
insignificante."

Lapenna ha respondite in esperanto effectivemente que ille non
comprendeva le subjecto pro le debatto que Gode ha proponite.
Assi ille non voleva guastar su tempore in un debatto sterile
(de su puncto de vista).  Gode ha respondite:

"Si Dr. Lapenna vole usar le occasion de un debatto con me pro
exalter le esperanto e denigrar le interlingua, io non va
reciprocar, proque io tene que experanto "es un cosa del specie que
gentes como aquelles ama aquello" e le facto que io non es un de
aquelles non es sufficiente ration pro me a concluder que necuno
altere debe esser como aquelles. Si il ha un frequentemente
exprimite pretension esperantistic que io senti libere a rejicer,
alora illo es le pretension que le existentia del interlingua
interferi con le labor que es facite pro le esperanto e que le
existentia del esperanto implica le indesirabilitate del
existentia de interlingua."

Evidentemente le esperantistas non poteva vider que interlingua
e esperanto pote coexister sin le interferentia. E proque le
conditiones de Gode pro participar in le debatto esseva
rejectate per le esperantistas, illes ha declinate participar
in un debatto.

Obviemente e Dr. Lapenna e Dr. Gode habeva lor diplomas como
doctores del philosophia depost multe annos quando  iste
excambio occurreva in 1963. Assi iste memoria de Kjell sembla
basate super un misintendimento.

Mi base pro presentar iste factos es le antique copias que io
ha del International Language Review de 1963.

Stan Mulaik

=====================================================Pro disabonar te del lista, invia un message a
[log in to unmask] con le texto:

  UNSUBSCRIBE INTERLNG

o visita le sito del lista:

  http://maelstrom.stjohns.edu/archives/interlng.html
=====================================================Visita le sito official del Union Mundial pro
Interlingua:

  http://www.interlingua.com/
=====================================================