Le Union Mundial pro Interlingua (UMI) es hodie un organisation mundial 
legalmente registrate.

51 annos post su establimento, le UMI esseva le 3 de augusto 2006 
registrate juridicamente per le autoritates francese. Le subprefecto del 
departimento de Etampes in Francia approbava le registration que significa 
ancora un officialisation del stato del organisation mundial pro 
interlingua.

Le Union Mundial pro Interlingua es ora un nomine registrate e assi 
protegite contra misuso.

Le recognoscentia official face possibile pro le UMI entrar in 
collaborationes international e ager juridicamente in su proprie nomine 
como organisation international. Un proprie conto bancari in le nomine del 
UMI assi essera establite intra breve tempore. Le informationes practic 
essera annunciate per le magazin official del UMI, Panorama in 
interlingua, e per le sito del UMI in Internet al adresse 
www.interlingua.com.

"Un recognoscentia legal es un passo decisive pro le developpamento del 
organisation international e anque un optime instrumento pro facer se plus 
visibile, pro annunciar nostre voluntate de participar activemente in lo 
que succede in le spatio public in nostre paises. Io spera que post iste 
registration official nos habera plus de audacia e plus de motivation pro 
continuar le effortios de omnes qui durante tote le annos post 1951 ha 
consecrate un grande parte de lor vita a interlingua," dice Petyo Angelov 
(Bulgaria), secretario general del UMI, con referentia al publication del 
prime obra de interlingua ante 55 annos.

Le nove statutos del UMI ha essite deponite presso le autoritates 
francese. Le UMI ha essite registrate como association numero 0911004931.

Francia esseva le pais in le qual le UMI esseva fundate le 28 de julio 
1955, quando le 1-me Congresso International de Interlingua esseva 
arrangiate in Tours, in le west de Francia. Francia anque usa le euro como 
valuta. Iste facto es importante pro le administration lisie del 
organisation. Etampes es le sede del tresoreria del Union Interlinguista 
de Francia que ha essite de adjuta invalutabile pro le registration del 
UMI.

Barbara Rubinstein (Svedia), presidente del UMI, nota que le 
recognoscentia veni justo ante le 100-esime anniversario in octobre de 
Alexander Gode-von Aesch, le ultime director de recercas del International 
Auxiliary Language Association (IALA).

"Le nove stato legal del UMI debe facilitar le introduction del obra de 
Alexander Gode e su collaboratores, le instrumento moderne de 
communication international interlingua, in importante foros e 
organisationes international," dice Barbara Rubinstein.

--
Archivos e disabonar: http://listserv.icors.org/archives/INTERLNG.html