De http://www.interlingua.com:

==============
Radio Interlingua aperi hodie - post multe annos de silentio - con
emissiones regular in interlingua.

Al pagina http://www.interlingua.com/radio on pote ascoltar directemente
le radio, o on pote discargar le emissiones como podcasts pro un sonator
MP3. Le prime emission de 15 minutas presenta le radio, explica que es
interlingua, e presenta le prime de un longe serie de interviews del
11me incontro nordic de interlingua in Svedia in le fin de julio 2008.
Le radio anque include musica.

»Radio Interlingua ha le scopo de informar interessatos super le
existentia e usabilitate de interlingua - internationalmente ben
comprensibile e vivente, usabile efficacemente pro communication verbal.
Radio Interlingua tamben informa le movimento de interlingua super le
occurrentias recente del vita interlinguaphone,« dice Péter Kovács,
Hungaria, qui es le redactor del radio.

Le plano es producer un nove programma cata mense. On pote »abonar se«
al radio per usar le function RSS.

Péter Kovács establi ora un rete de contributores regular pro le radio
que ille ha planificate longemente, assi que on vermente pote audir como
interlingua es un lingua in plen flor e multo vivente, gratias al multe
voces qui participa in le labor.

Radio Interlingua esseva originalmente in Internet durante 1997-1998 con
Simona e Florin Sunel, Romania, in le redaction.
==============

Ciao,
   Alberto

--
http://www.mardy.it <-- Geek in un lingua international!

--
Archivos e disabonar: http://listserv.icors.org/archives/INTERLNG.html