Actualitates mundial del septimana
Le papa favora le uniones civil pro homosexuales
In le documentario-portrait Francesco, diffundite dum festival de
films a Roma le 21 de octobre, le capite del Ecclesia catholic roman
faceva un nove passo in le direction del pares de mesme sexo. Parolas
historic, pois que isto es le prime vice que un papa sustene le
derectos del homosexuales e lor protection juridic. Un progressismo a
relativisar: pro le soveran pontifice, le maritage remane le union
inter un viro e un femina. Al Vaticano, su prension de position re le
question homosexual divide le cardinales e le fideles. In 2014-2015,
dum un debatto a Roma, le episcopos de tote le mundo non trovava un
accordo re iste subjecto.
Le retorno de Saad Hariri al potentia
Designate prime ministro de Libano per le presidente Michel Aoun
jovedi le 22 de octobre, ille prende le relevamento de Hassan Diab
post su resignation. Durante su designation, ille promitteva establir
rapidemente un governamento componite de expertes. Le objectivo es
facer reformas structural pro sortir le pais ex le crise, quasi tres
menses post le explosion al porto de Beirut. Un retorno contestate pro
iste figura del politico libanese, jam al testa del governamento de
2016 a 2019 e fortiate resignar per manifestationes de strata ante
justo un anno. Le nove prime ministro debera convincer le populo
libanese e Francia, multo implicate in le affaires del pais.
Le governamento statounitese attacca Google
Le interprisa de Silicon Valley ha essite accusate de abuso de su
position dominante in le Statos Unite, le 20 de octobre. Sustenite per
dece-un statos del pais, le governamento federal reprocha le
interprisa de haber mantenite su monopolo in le recerca in-linea
gratia a accordos remunerate. Iste processos, intentate per le
justitia statounitese, representa le plus importante action judiciari
ducite contra uno del gigantes numeric desde le celebre processo
contra Microsoft in 1998. Altere mastodontes como Facebook, Amazon, e
Apple es concernite per iste procedura antitrust.
Ultime negotiationes super le Brexit
Le Regno Unite e le Union Europee entra in le ultime phase de
negotiationes re le Brexit, jovedi le 22 octobre. Un retorno al tabula
de discussiones pro un accordo de libere excambio post un septimana de
blocamento. Le prime ministro Boris Johnson ha avertite le britannos
se preparar a un « no deal » (sin accordo), venerdi le 16 de octobre.
Plure punctos de blocamento complica le negotiationes, inter alteres
le pisca in aquas britannic, le concurrentia e le regulamento del
disaccordos inter le duo mercatos. Un accordo debe esser trovate ante
le exito del Regno Unite ex le Unio Europee le prime de januario 2021.
In Polonia, le abortamento quasi illegal
Le tribunal constitutional polonese interdiceva le abortamento in
casos de malformation grave del feto, jovedi le 22 de octobre. Un
induramento impreviste del legislation re un mesura que concerneva 98%
del abortamentos legal in 2019, secundo le jornal Le Monde. Un
requesta conforme al politico conservative del partito in potentia,
Derecto e Justitia (PiS), post duo insuccessos interdicer totalmente
le abortamento in 2016 e 2018. Le annuncio causava un manifestation
ante le sede del tribunal in Varsovia ubi se affrontava opponentes e
fundamentalistas catholic. Internationalmente, le decision es
criticate como essente un violation del derectos del homine.
Le inferno carceral nord-coree
Le organisation non-governamental Human Rights Watch denuntia le
systemo de detention provisori in Corea del Nord in un reporto
publicate le 19 de octobre. Titulate «Nos vale minus que le animales»,
iste inquesta revela le inhuman conditiones de vita del incarceratos.
Per su 88 paginas, le reporto del organisation de defenso del derectos
del homine gruppa decenas de testimonios de ancian prisioneros. Plures
inter illes testifica haber suffrite violentias physic e sexual
extrememente brutal. Certe incarceratos declarava haber essite
battite, humiliate, mesmo violate. Le Corea del Nord de Kim Jong-un lo
nega, e accusa le communitate international de diffamation.
Retorno in fortia del sinistro bolivian
Le bracio dextre de Evo Morales, Luis Arce, ha ganiate le election
presidential in Bolivia, dominica le 18 de octobre. Un suffragio sub
alte tension post le displicamento de 23 000 policieros e militares in
le pais per le governamento provisori. Le candidato del Movimento
verso le socialismo (MAS) recipeva 52% del voces contra le centrista e
ex-presidente Carlos Mesa. Iste voto deberea finir un periodo de crise
politic post le resignation del ancian presidente Evo Morales in
novembre 2019. Iste ultimo, accusate de fraude electoral per le
opposition, es in exilio in Argentina desde decembre 2019.
Fonte: http://rattrapages-actu.fr/articles/attentat-a-conflans-sainte-honorine-couvre-feu-etendu-a-38-departements-resume-de-la-semaine
--
Pro leger le archivos e pro modificar o cancellar le subscription:
http://listserv.icors.org/archives/interlng.html
|
