Accrescimento del tensiones inter Francia e Turchia

Mercuridi, le 28 de octobre, Turchia annunciava le apertura de un
inquesta contra Charlie Hebdo pro le publication de un caricatura de
Recep Tayyip Erdoğan. Isto es le novissime episodio de un querela
inter le duo presidentes. In su homage al professor assassinate Samuel
Paty, Emmanuel Macron reaffirmava le derecto de caricaturar. Recep
Tayyip Erdoğan alora invitava ille «se facer curar». Per represalia,
Francia revocava su ambassador a Turchia. Pois le presidente Erdoğan
appellava al boycott del productos francese, un initiativa que ha
essite particularmente sequite in Quatar e in Kuwait. Manifestationes
anque habeva loco in plure paises como Pakistan contra Francia.
Sabbato le 31 de octobre, Emmanuel Macron se exprimeva sur le canal
Al-Jazeera pro explicar le modella de laicitate francese e tentar
appaciar le tensiones.

Insurrectiones in Costa Eburnee post le election presidential

Le 31 de octobre, le presidente sortiente Alassane Ouattara ha essite
declarate victor del election presidential, causante vive reactiones
del parte del opposition. Le commission electoral (CEI) que gere le
scrutinios confirmava le victoria del presidente sortiente con 94,27%
del voces. Sed su duo rivales principal, Henri Konan Bédié e Pascal
Affi N’Guessan, contestava le votation parlante re «colpa de stato
constitutional». Alassane Ouattara sollicita un tertie mandato
quamquam le constitution autorisa solmente duo. Le resultato provocava
multe manifestationes que se transformava in violentias inter
communitates. Depost le mense de augusto, Costa Eburnee conta un
trentena de mortos.

Le Algerianos boycotta massivemente le referendum del regime

Illo es un referendum pro un «nova Republica», durante que solmente
23% del population habeva votate dominica le 1e de novembre. Le
resultatos annunciate le die sequente monstrava le victoria del «si»
per 66%. «Algeria entra in un nove era con un nove Constitution que ha
essite adoptate per le populo algerian in plen transparentia e in plen
responsabilitate», declarava Mohamed Charfi, presidente del Autoritate
national independente del electiones. In lucto a causa del morte de
Lakhdar Boumegaâ, figura del guerra de independentia de Algeria e un
militante pro-hirak, le opposition sublinea que le taxa de
participation in le referendum es le minus alte in le historia
algerian.

Le Labour se separa de su chef

Jovedi, le 29 de octobre, le partito laborista britannic suspendeva
Jeremy Corbyn del direction pro haber criticate un reporto le
reprochante su «manca de voluntate» in le lucta contra antisemitismo
in le sino del partito. Iste reporto es le fructo de un inquesta del
EHCR, le Commission pro equalitate e derectos human. Le periodo visate
per le reporto es ille del mandatos de Jeremy Corbyn, de 2015 a 2020.
Inter omne le accusationes del reporto, Jeremy Corbyn refutava
alicunes in un message Facebook, precisante tamen que «le
antisemitismo es absolutemente injuste, repugnante e responsabile del
crimines le plus grave del humanitate». Il se monstrava indignate per
iste accusationes parlante re un «die de vergonia» pro le partito.

Francia de nove sub confinamento

Emmanuel Macron annunciava mercuridi le 28 de octobre, per vive voce
al television, un confinamento per tote le territorio national,
excepte certe territorios trans-marin, durante al minus un mense.
Facie a un tal mesura, le politicos non falleva reager. Le sinistro
globalmente apportava su supporto a un decision que illo judica
necessari. Le dextera regrettava que illo non habeva essite facite
plus rapidemente. Quanto al syndicatos, illos time le consequentias
economic catastrophic de un secunde confinamento. Un timor dividite
per le Franceses, cuje «taxa de inquietude se altiava a 91%» dum le
allocution de Emmanuel Macron, secundo un sondage.

Le canales de television statounitese arresta le transmission del
discurso de Donald Trump

Jovedi, le 5 de novembre, Donald Trump de nove accusava le democrates
de fraudes, durante un conferentia de pressa in le Blanca Domo. Ille
mirava que le ballotas per correspondentia iva «omne verso le mesme
direction» (lo de Joe Biden). Le canales que transmitteva le
conferentia de pressa, como CNN, decideva secar curte le allocution de
Donald Trump que illes judicava «periculose». Un bandierola sur iste
mesme canal monstrava: «Sin ulle prova, Donald Trump affirma que ille
es le victima de un fraude». Fox News, un canal reputate proxime del
presidente sortiente, anque se distantiava, precisante que ille habeva
nulle medio provar su affirmationes.

https://donesra.wordpress.com/2020/11/07/actualitates-mundial-1-7-novembre/


--
Pro leger le archivos e pro modificar o cancellar le subscription:
http://listserv.icors.org/archives/interlng.html