Car amicos,
Recentemente Alix Potet, su soror Madeleine (secr.de UIF)
e su sposo prof. (de informatica) Jean-Pierre Elloy ha visitate
prof. Martinet e facite un longe interview registrate per magneto-
phono.  In illo prof. Martinet dice clarmente que le causa de su
partita de IALA esseva simplemente que ille (M.) esseva offerite
tres professoratos (le sposa expectante un baby prefereva le SUA)
e que le "controversia" esseva ni grave ni essential.
Mi prof. de phonetica, Dr Bertil Malmberg del Univ. de Lund, qui
cognosceva Martinet, diceva lo mesme.  Le "conflicto" es un invention
de esperantistas e de occidentalistas, qui *desirava* que le grande
linguistico Martinet esseva in disaccordo con Gode.
Le stupiditates que Gode "sol faceva le lingua" es horribile!  Interlingua
non es identic con le variante P(rototypic).  E como pote un homine
normal assumer que le grande labor de extraction e standardisation
per le personal de IALA haberea essite lassate sin consideration?!?!

In un longe conversation con Alice M(orris). Sturges, filia de Alice V(anderbilt)
Morris, que io va contar in le veniente historia de Interlingua, illa me
confirmava le factos in supra e diceva (multo directemente) "Ab le puncto
de vista de I-a le morte de Matre esseva beneficial, proque alteremente
I-a forsan nunquam haberea essite finite.  Illa habeva un tal interesse pro
detalios e un voluntate forte e voleva interferer usque al puncto ubi
Dr Gode, qui esseva un homine plen de charme, perdeva su patientia
e demandava que illa le lassa in pace pro finir le obra secundo *su*
ideas, e non secundo le capricios de Matre".
Si io mori ante finir iste capitulo, "Le mythos", pro le historia de I-a
vos pote citar isto...    Sra Sturges - etiam un femina de charme - indicava
que Sra Morris sovente habeva vistas linguistic "radical".
Prof. Martinet etiam diceva, reguardante un numero de Panorama:
que isto semblava esser Interlingua tal qual ille lo haberea volite.
Con salutes amical,
Ingvar


*********** REPLY PARTITION ***********

On 1997-11-30, at 15:15, STAN MULAIK wrote:

>Jay,
>  Io non cognosceva usque vos lo diceva que Sra. Morris esseva un
>Vanderbilt. Qual fonte ha vos pro vostre informationes?
>
>Anque, esseva le ration que Martinet ha partite de IALA a causa de disaccordo
>con Dr. Gode?  Le IED solmente dice que Martinet partiva de IALA a devenir un
>professor a Universitate Columbia (in Nove York), e Dr. Gode assumeva le final
>labor como Director (qual position ille habeva como Director pro tempore
>durante le Guerra Mundial II, quando Sr. Stillman ha vadite al Departimento
>del Stato).  Io ha un memoria vage, que Dr. Gode me diceva que a ille tempore,
>quando Prof. Martinet ha partite de IALA, lassante necuno a complir le
>labor, Sra. Morris alora veniva a ille a peter le assumer le position. Ille
>habeva justo recipite un bon offerta de un position como professor a
>Vanderbilt Universitate (ah ha! le intriga deveni plus dense), e pro
>satisfacer su requesta, ille requireva multo de illa.  Si isto esseva plus
>que un bon salaria, p.e. libertate del interferentia, io non cognosce. Mais
>possibilemente le disaccordo inter Gode e Martinet esseva que Martinet non
>intendeva le philosophia del personal previe qui ha facite le labores durante
>le guerra (p.e. de Stillman e alora Gode), le philosophia del prototypo.
>Possibilemente, Martinet ha usate su connexiones con IALA a venir a Nove York,
>e alora a discoperir un bon position in Nove York al Universitate Columbia.
>Qui cognosce iste detalios historic?
>
>Stan Mulaik
>