Le venerdi passate io ha conducite mi camionetta Grand Voyager per un
pluvia a Georgia Tech. Toto passava bon usque io arrivava al parco de
automobiles.  Quando io parcava mi automobile io  notava alcun vapor
escappante al fronte de mi automobile.  Il debe esser le aqua del strata
super le motor.  Mais io decidiva a examinar su fonte plus attentivemente.
Alora io videva le guttas de un liquido rubie cadente in le canaletto
al fronte de mi automobile, como le sanguine que es le fluido de vita de
mi automobile.  Io examinava le liquido plus attentivemente.  Illo esseva
oleose in mi digitos. Qual fluido es rubie?  Non le fluido de radiator,
que es alquanto verde e jalne. Le sol altere fluido in iste location,
altere que le oleo del motor mesme (que es nigre o brun), es le fluido
del transmission. Si, le fluido de transmission.  Potesser que io debe
vader al garage post mi lecturas hodie.

Post mi lecturas e un meeting con un studente, io finalmente retornava
al parco de automobiles. Io notava le color de rubie in un parve stagno
de aqua in le canaletto a basso de mi auto.  Io ha perdite multe fluido.
Alora quando io essayava a vader in reverso a partir del parco, mi
motor solmente curreva sin ingagiar le rotos.  Le transmission habeva
necun fluido!

Io semper porta in mi automobile le fluidos vital de su function.  Io
habeva un quarto de fluido de transmission, e io poneva lo in le transmission,
e io de novo essayava a vader in reverso.  Succedite!  Io commenciava mi
viage al garage.

Io stoppava a un station de gasolina e comprava tres quartos del fluido
de transmission, e io immediatemente poneva le prime in le transmission.
Le automobile vadeva melior, e io procedeva a cammionar in le circulation
lente a mi destination, circa 10 milas distante.

Mais post solmente 10 minutas, io notava que le transmission non
functionava ben de novo.  Io finalmente trovava un loco ubi io poteva
stoppar, le entratra a un schola secundari.  Io usava le secunde quarto
de fluido.

Le circulation de automobiles esseva lente, e io esseva frustrate e anxie.
Il habeva pauc locos ubi io pote stoppar.  Ancora le auto continuava a
vader usque io esseva foras le superstrata que circula Atlanta, que es
circa 20 milas in diametro.  Alora io cercava un altere loco ubi io pote
stoppar.  Finalmente, presso mi destination, io vadeva in le parco de
automobiles pro Ed Voyles' Honda.  (Mi destination esseva Ed Voyles
Chrysler-Plymouth, un altere affaire del mesme proprietario), un breve
distantia plus alte in le strata.  Mais post usar mi ultime quarto de fluido
de transmission, como io essayava retornar me al strata, io discoperiva duo
automobiles ante me, attendente un lacuna in le circulation pro entrar
le strata.  Le circulation esseva dense.  E nos attendeva pro lo que me
pareva un multo longe tempore.  Io esseva anxie que le ultime quarto
escapparea ante que io poteva vader. Mais finalmente le lacuna pareva,
le automobiles in le fronte de me entrava le circulation, e io sequeva.
Il esseva solmente un curte distantia a mi destination, e como le
transmission de novo monstrava signos que illo esseva laborante con su
final guttas de fluido, io guidava mi auto al fronte del entrata a in
le garage.

Quando le representante del departimento de servicio appareva a querer
me, io notava un collection de rubie fluido sub le fronte de mi
automobile.  Le ultime guttas de vita habeva passate de mi automobile.

Io lassava mi pobre automobile al garage pro le fin del septimana. Illes
non poteva reparar lo usque lunedi.

A lunedi io remaneva a casa, post portar mi sposa a su occupation como un
comissa de venditas a Rich's, un grande magazine non lontan de nostre
casa. (Nos usava su automobile, un Mitsubishi Gallant de 1993).

Finalmente io telephonava le garage.  Illes finalmente ha examinate mi
automobile.  Le sol problema con le perdita de fluido de transmission
esseva un tubo flexibile rupturate.  Le tubo portava le fluido del
transmission al radiator pro refrescar lo.  Il esseva simple a
reparar - solmente $165,00.  Aii!  Le mechanico non esseva certe que
tote esseva bon con le transmission.  Ille voleva examinar lo in le
matino deman. De plus, io ha rememorate a peter le mechanicos a
examinar le pedal de freno de urgentia, proque illo functionava mal,
e a vices non extingue le lumine que le freno esseva accendite.

Hodie matino io telephonava le garage.  Le mechanico ha examinate le
transmission e ha conducite le automobile sin difficultate.  Le
transmission functionava ben.  E ille ha examinate le pedal del freno
de urgentia.  Illo esseva non plus servibile.  Un nove pedal esseva
requirite.  De plus un altere $165.  Aii!

Bon!  Reparar lo, io diceva al representate de servicio.  Ille habeva
le sanguine de mi automobile e le sanguine de mi conto bancari.

Post lunch io e mi sposa nos conduceva in su automobile al altere
latere de Atlanta, al officina de un tapisseria, ubi le septimana previe
le tapissero habeva portava nostre vetule sofa pro renovar lo.  Hodie
nos va selectionar le texito pro coperir le sofa.  Possibilemente si mi
sposa habeva vadite solo, il non esserea un tanto difficile cosa a
facer.  Mais con me presente, duo personas debe decider.  Potesser il
es bon que io vadeva.  Illa voleva selectionar un patrono que a me
pareva como un grande macula de tinta brun e jalne.  Finalmente nos
selectionava un imprime de flores, similar al patrono super le nove
sofa in nostre camera de television.  Su colores esseva in accordo
con le altere.  Toto esseva satisfactori con illa e io.

Alora io usava mi telephono mobile a telephonar le garage.

"Es mi automobile preste pro me a recuperar lo?"

"Si".

Quando nos arrivava al garage, in loco de vader directemente a recuperar
mi automobile, nos decideva a vistar le camera de demonstration de nove
automobiles.  "Io vole vider un nove 1998 Grand Voyager" io peteva del
agente de venditas qui salutava nos.

Assi ille portava nos in un parve automobiletto al posterior de lor
grande parcella de terra, ubi il habeva un parco de automobiles nove.
Nos examinava un nove Grand Voyager.  Le precio esseva enorme! $24.000 -
26.500.  Mi prime casa solmente costava $18.000! (Ille esseva 30 annos
previe).  Nonobstante un breve excursion in un nove Grande Voyager
esserea bon pro mi stato de mente.  E nos conduceva lo pro circa
10 minutas, quando nos retornava al venditor pro lassar le automobile
con ille.  Io dava mi nomine e numero de telephono al agente.  Nos esseva
interessate, mais nos non pote comprar hodie, io explicava.  Nos esseva
aqui pro recuperar mi automobile, mi vetere Grand Voyager de 1989.

Post pagar le $350 pro recuperar mi automobile, un mechanico lo
conduceva al entrata pro me.  Post seder me a su volante, io pressava
le pedal de acceleration, e io notava que le automobile vadeva
generalmente justo como le nove Grande Voyager.  Io notava pauc
differentia.  Possibilemente un anno plus, io pensava a me. Un anno
plus e alora io pote comprar un nove Grand Voyager.

Stan Mulaik