LE LOCOMOTIVAS DEL MUNDO
Europa e Statos Unite trahera le disveloppamento del economia mundial in le
proxime seculo.
(Eliana Simonetti)

Duo previsiones a respecto del futuro del economia mundial, antagonistic
inter se, divide le economistas. Le prime ha essite create per le crise
economic que ha abattite le paises emergente. Secundo ille ratiocination,
illes ha habite le opportunitate de biber del capital mundial, de crescer e
approximar se del mundo disveloppate e ric. Con lor impudicitia economic,
illes ha traite le confidentia de qui les ha prestate pecunia e a causa de
illo illes passara le seculo 21 in stato de inanition. Le ricchessa e le
stabilitate continuarea monopolio del potente alliantia atlantic fundite
inter Europa e Statos Unite. Le altere vision del seculo 21 es satis
differente. Le locomotiva dirigite per le Statos Unite e per le Union
Europee sera forte e veloce como nunquam, mais le emergentes sera
beneficiate con nove technologias, investimentos e diminution del povressa.

Ille situation ambigue ha arrivate al copertura de duo del plus prestigiose
revistas economic del mundo. Le statounitese BusinessWeek ha restate con le
prognostico negative. Illo ha antevidite le le emergentes in un fossa funde
e ha constatate que le statouniteses e europeos se ha congregate in un
blocco economic inclinate sur le proprie umbilico. Illes viverea in un
globo de vitro con autosufficientia economic. "Statos Unite e Europa es le
ancoras global del prosperitate e del stabilitate, durante que le resto del
mundo se debatte in le limbo economic", dice le reportage. In un edition
special super le stato del economia mundial in 1999, le revista anglese The
Economist ha pingite un tela satis plus suave. Le machina formidabile
montate per le integration del economias statounitese e europee
functionarea como un factor de prosperitate pro paises como Brasil, India,
Africa del Sud e Polonia.

Le economia non es un scientia exacte, pro isto illo non permitte
affirmationes multo vehemente. Al contrario de que registra le [Corão],
nihil es scripte. Necun destino es determinate. Le [Tratado de
Tordesilhas], del seculo 15, ha dividite le mundo inter Portugal e Espania,
paises considerate le motores del economia. Duocentos annos postea, le duo
era immerse in le povressa. In le seculos 18 e 19, Anglaterra era senior
del mundo. Hodie, proxime al Statos Unite, illo es potentia de secunde
classe. Le proprie economistas ha un burla a respecto de lor profession.
Illes dice que, sempre que tres economistas se sede pro biber bira in un
bar, surge cinque opiniones equalmente plausibile, probabile e antagonic.

Multe cosa ha cambiate. In minus que dece annos, le economia ha prendite un
cammino que non era previsibile, ergo il non ha plus unanimitate super
quecunque. Le crise in Asia, in Russia e in Brasil ha essite un grande
surprisa. Le creation del potentia transatlantic que es le blocco del
dollar con le euro ha essite altere. Pro qui ama numeros, il es le
sequente: Le duo machinistas del locomotiva mundial summa un PNB de 14,5
billiones* de dollares. Illos es responsabile pro 36% del commercio
international. Nunquam il ha habite un organismo tanto magnific. Illo es
formate non per governamentos, mais per companias que se uni, misce
capital, excambia technologia e provoca un approximation cultural. Le union
ja occurre in duo polos: bancas e montatores de vehiculos. Le major banca
del mundo sera le Deutsche Bank german associate al statounitese Bankers
Trust. Le Chrysler statounitese se ha maritate con le Daimler-Benz german.
Le Ford ha inglutite le Volvo svedese. Europeos e statouniteses comencia a
discuter ora le formation de un blocco economic plus ample e cosmopolita
que le Nafta (accordo commercial inter le Statos Unite, Canada, Mexico) e
le Union Europee. "Milliones de empleos statounitese dependera del
stabilitate economic europee e vice-versa", dice Juergen Schrempp,
presidente del DaimlerChrysler, un del de defensores del idea.

Il pare mesmo que nihil resta pro qui ha restate foras de ille cordon
virtuose. Mais, quando on pensa in le processo de globalization economic,
le resorto que ha precipitate ille integration inter Statos Unite e Europa,
on vide que le cosa probabilemente non sera assi. Le logica del
globalization es un competition tremende pro le mercatos e precios in le
division del travalio mundial. Mercato le paises emergente ha. Illo es
numerose e ha besonio de toto. Il es erronee pensar que le capitalista
europee e le statounitese non sape que ille gente pote render les medie
planeta de lucro per anno. Precio le emergentes pote offerer. Lor obreros
es plus incostose, assi como le materia-prime e le terreno pro le fabrica.
"In le mundo capitalista que visa al lucro, totes sape que illes non pote
occider le gallina del ovos de auro", dice Alceu Landi, presidente del
interprisa de consultation KPMG in São Paulo. "Le dynamica del economia
global produce un accumulation de ricchessa multo grande, e ergo illo non
sera abandonate", affirma Gilberto Dupas, coordinator del area de affaires
international del Instituto de Estudos Avançados del Universidade de São
Paulo.

Era ille processo de aggregation de partes plus povre al plus ric que era
in curso usque 1997. Alora ha evenite le crise financiari de Asia, le
ruptura de Russia e le collapso de Brasil. Le sensation de choc e de
perdita de confidentia ha succutite tote le mundo. Ha essite plus un
ingrediente in le incertitudes economic generate per le globalization.
Quando on analysa un periodo plus longe, le incertitudes es absorbite per
un tendentia plus generose. Illo que on nota es que in le periodo que se ha
succedite al Prime Guerra Mundial le paises emergente, ha devenite, pauc a
pauc, plus similar al economias central, mesmo si ille differentias ancora
es brutal. Malgrado quanto incredibile illo pote parer, le ricchessa
mundial ha essite, anno a anno, plus ben dividite. Le Statos Unite, que ja
ha detenite 40% del PNB mundial, hodie resta con solmente 22% -- le
tendentia es que lor trencho cade plus in le proxime decennios, usque alco
circa 15%. Qual conclusiones on pote tirar de isto? Le prime, obvie, es que
le ricchessa statounitese migra a alicubi. Le secunde, minus clar a prime
vista, es que, in medio a tante turbulentia e incertitude, qui imbucca le
ricchessa es le paises que ha aperite lor economia.

Le anno de 1999 sera difficile. Mesmo in le Statos Unite le crescimento
debera attinger circa 2% (illo ha essite de 3,5%, in media, in le ultime
annos). In Japon es expectate un retraction economic de 2%. Le pais entrara
in le anno 2000 al minus 5% plus povre que quanto illo era al final de
1996. In America Latin on estima que le crescimento sera de 1% (in 1998
illo ha essite de 3% e in 1997, de 5%). Mais il ha bon ration pro creder
que, in le proxime seculo, le nationes le plus povre retorna a profitar del
ricchessa administrate per europeos e statouniteses. ###
---
AFRICA: Le Africa negre es le region que le minus se ha integrate economia
international. In Africa del Sud, Nigeria, Quenia e Egypto, que ha
duplicate lor PNB desde 1990, le investimentos debe continuar guttante. Le
altere paises gusta le marginalitate. Pro le productores de petroleo, le
cadite del precio del producto sera un colpo. In Statos Unite le gasolina
es plus incostose que aqua inbottiliate.

AMERICA LATIN: Le crescimento medie del PNB debera esser, in le melior del
hypotheses, de 1% in 1999. Illo es multo pauc si comparate al 5% de 1997.
Le region sera affectate per le cadita del precios de minerales e granos,
productos que illo exporta. Mais, perque es importante le partenariato
commercial con le Statos Unite, America Latin debera esser beneficiate per
le crescimento statounitese.

ASIA: In april entra in vigor le lege que tracta del bancas japonese,
cargate de creditos "putride". On expecta que al minus sex de illos
claudera e trahera con se milles de interprisas minor. Le recuperation sera
lente. Corea del Sud e Thailanda ja es in recuperation. In iste anno le
Philippinas debe crescer 2% e le Vietnam, 5%. Le major preoccupation es
Indonesia, que ha 40% de su population infra le linea del povressa.

STATOS UNITE E EUROPA: In le ultime menses le duo potentias se ha
approximate. Fusiones de interprisas del duo continentes appuncta verso le
creation de un nove e potente axe economic transatlantic con un ricchessa
de 14,5 billiones* de dollares e poter pro controlar 36% del commercio
international. Con le adoption del moneta unic, Europa comenciava esser un
mercato economic privilegiate, con minus riscos pro le investitores. Illo
va attraher 7 de cata 10 dollares de investimento global in 1999.
--
* "[Corão]": Le libro sacre del musulmanos.
* "[Tratado de Tordesilhas]": Tractato que determinava un meridiano
divisori pro divider le terras trans le Atlantico. Le terras al dextra
serea de Portugal, e le terras al sinistra serea de Espania.
Consequentemente, Portugal obteneva solmente un parve section oriental de
America del Sud. Per invader le territorio inexplorate trans le linea
divisori, verso west, le portugeses stabiliva le actual extension
territorial brasilian.
* "billion": 1.000.000.000.000.

Ensjo.
Traducite de Revista VEJA, edition 1584, anno 32, nº 6, 10 de februario de
1999.