ITALIA RESULTA VINCITOR IN LE DISPUTA DEL ESTRANIEROS
Per "La Vita è Bella", Roberto Benigni gania le statuetta de melior
film in lingua estranier.

LUIZ CARLOS MERTEN

Ancora non ha essite de iste vice que Brasil recipeva le Oscar de
melior film estranier. Exactemente a medie-nocte, Sophia Loren aperiva
le inveloppe e non disguisava le grande, immense surriso in annunciar:
"Roberto". Era le contrasigno pro que Roberto Benigni saltava sur le
sedia ante se e se precipitava verso le podio, in le Dorothy Chandler
Pavillion. "La Vita è Bella" defaitava le aspiration de "Central do
Brasil" de esser le melior film estranier del anno in le Oscar 99.
Mais illo ha essite multo applaudite, si isto servi como consolation.
In su discurso de gratias, Benigni diceva que voleva immerger se in le
mar del generositate de Hollywood.

"Si io es hic il es perque vos ha amate mi film", diceva ille,
dedicante "La Vita è Bella" "a illes qui non es hic (le victimas del
holocausto)". "Ha essite illes qui nos inseniava, con su dolor, que le
vita es belle." A su latere, Sophia Loren non succedeva a disguisar le
lacrimas. Illa vibrava con le victoria italian e, alias, illa arrivava
al puncto de declarar a amicos que illa solo habeva acceptate livrar
le premio perque illa habeva essite convincite per le direction del
academia que le film de Benigni esserea le vincitor.

Ante le initio del ceremonia, Whoopi Goldberg ascendeva al scena del
Dorothy Chandler Pavillion vestite como regina Elizabeth I. Personage
de duo del principal indicatos, "Elizabeth" e "Shakespeare in Love",
le Regina Virgine se prestava a tote le burlas del presentatrice.
Tosto in sequentia se initiava le premiation. Shakespeare se avantiava
con duo premios meritate: le de melior direction de arte e le de
melior actrice coadjuvante, pro le extraordinari Judi Dench. Mais
"Shakespeare" tamben perdeva de initio tres premios — le de melior
coadjuvante masculin, que restava con le veterano James Coburn, per
"Affliction", melior fardo [maquiagem; makeup; trucco], pro
"Elizabeth", e le de melior sono, pro "Saving Private Ryan". Assi, del
13 indicationes que le film habeva recipite, tosto deveniva clar que
illo non equalarea le records de "Ben Hur", de William Wyler, e
Titanic, de James Cameron, ambes vincitores de 11 statuettas. Mais
"Shakespeare" continuava a reciper Oscars.

Illo ganiava le de melior banda sonor de comedia. Benigni tamben
continuava a collectionar su statuettas. "La Vita è Bella" recipeva le
premio de melior banda sonor de drama. Tote isto in medio a un show
que habeva momentos de brillantia. Un clip in homage al 100 annos del
cinema e al 70 de premios del academia e altere, con consultation de
Martin Scrocese, accentuante le filmographia de Blue Eyes, le grande
Frank Sinatra, con scenas de su principal films, e mesmo de ille
cantante.

"Saving Private Ryan" tamben se eminentiava como un del vincitores del
nocte: a 0h30min le film de Steven Spielberg ja habeva recipite tres
Oscars — sono, effectos sonor e montage. Como presentatrice, Whoopi
Goldberg habeva momentos multo divertente. Cambiante de vestes diverse
vices, illa satirizava le films indicate pro le premio de melior
costumes, faciente rider specialmente quando illa appareva vestite
como sclava, in un referentia al film con Oprah Winfrey, "Beloved".
"Sclava", diceva illa, "mais con mi brillante", ironizante le facto
que Oprah, qui interpreta le sclava del film de Jonathan Demme, es le
femina le plus ric del mundo del spectaculos in le Statos Unite.

Jornal 'O Estado de São Paulo', lunedi, 22 de martio de 1999.
--
   ENSJO : EMERSON JOSÉ SILVEIRA DA COSTA
Homepage : http://www.nautilus.com.br/~ensjo/
 UIN ICQ : 713833

INTERLINGUA - lingua auxiliar international
    Info : http://www.interlingua.com/europa/queesinterlingua.html
  Brasil : http://www.nautilus.com.br/~ensjo/ubi/