Traduction del subjecto: "Reguarda io* hic altere vice!"

(* Si, tamben in portugese deberea esser 'me' in vice de 'eu'/'io', ma isto
es un parte de un musica ubi on usa conscientemente un linguage erronee.)

Si, senioras e seniores, io es de retorno ab Brasilia, le capital de
Brasil, ubi io vadeva facer un curso de Windows NT per tres septimanas.

0) QUE SUCCEDEVA A ANNE BURGI???
Que causava le exita de mi car Anne Burgi del lista? Io discargava le
archivos del lista INTERLNG ab http://maelstrom.stjohns.edu pro leger toto
lo que io ha perdite durante iste 3 septimanas, e, per un lectura
non-profunde, io discoperiva que illa nos ha abandonate! Io debe leger toto
con plus attention, MA ISTO ES JA UN NOTITIA QUE ME RENDE MULTO TRISTE.

1) Brasilia
Brasilia es un citate planate, construite specificamente pro esser le
capital de Brasil. Le capital anterior era le citate de Rio de Janeiro, ma
un projecto de ante 1900 habeva le intention de mover le capital al centro
del pais, anque como un forma de promover le disveloppamento del pais verso
le west.

Brasilia ha essite planate per le architecto Oscar Nyemeier, e illo habe le
forma de un avion. Le "corpore" del avion es le assi-nominate "Eixo
Monumental" ("Axe Monumental"). Illo tene le Congresso, le "Palácio do
Planalto" ("Palacio del Altiplano") (ubi travalia le Presidente), le
Ministerios, le Superior Tribunal Federal, le Cathedral de Brasilia, le
Turre del TV, le Memorial JK (Juscelino Kubischeck, qui ha essite le
Presidente qui commandava le construction de Brasilia), etc.

Le "alas" del avion tene le parte residential e commercial del citate. Illo
es dividite in "quadras" numerate de un forma logic. Le curso de Windows NT
ha essite tenite in le Ala Nord, interquadra 712/713. (Le "interquadras" es
parve sectiones inter duo quadras que tene casas commercial.)

Le citate ha essite construite presso un laco artificial (facite per barrar
le aqua de un fluvio), nominate Paranoa'. A transverso del laco, il ha
tamben areas residential/commercial, nominate Laco Nord e Laco Sud.

On dice que un homine (del clero?) nominate Don Bosco ha predicite multe
annos retro que un civilization del futuro nascerea in le medietate del
America del Sud, presso un laco, e que Nyemeier se ha inspirate in iste
prediction pro construer Brasilia.

2) Le visita del Papa
Le papa Johan Paulo II visitava Brasil, que es le major pais catholic del
mundo. Su visita se limitava al Rio de Janeiro, e durava solmente un
fin-de-septimana, ma illo ha essite subjecto constante in omne canales de
TV.

3) Le festa del "Círio de Nossa Senhora de Nazaré"
("Cereo de Nostre Seniora de Nazareth")
Iste es un del major manifestationes de fide catholic de Brasil. Illo es un
festa specificamente de Belém, ubi io reside, e succede sempre al secunde
dominica de octobre. Toto gira in torno a un parve statua de Nostre Seniora
que ha essite trovate al margine de un fluvio. In un proxime message io
inviara un extracto del jornal de hodie.

Salutes mille! :^)
Es bon esser de retorno!
--
ENSJO: Emerson José Silveira da Costa
http://www.nautilus.com.br/~ensjo/

INTERLINGUA: Lingua auxiliar International
http://www.interlingua.com
Grammatica in anglese:
http://www.nautilus.com.br/~ensjo/interlingua/english.html