Salutes a totes,

Le traduction in interlingua del motor de recerca Google ja es
disponibile desde un anno. Usque a hodie, nonobstante, il manacava
ancora le paginas de adjuta e de information (le ligamines "Consilios
pro le recerca" e "Toto super Google" in le pagina principal). Ora,
Google ha finalmente publicate iste traductiones:

http://www.google.com/intl/ia/help.html
http://www.google.com/intl/ia/about.html

Iste paginas contine multe informationes utile super le mechanismo de
recerca le plus popular del web. Il vale le pena percurrer los.

Proque le traduction de iste paginas esseva un collaboration inter
Ensjo e me, il ha alicun inconsistentias stilistic. Il pote in ultra
haber altere errores de traduction. Si vos incontra un error
linguistic, per favor invia me un message describente le error e su
location exacte, e io arrangiara le correction de illo.

Io vole incoragiar tote le personas qui favori le promotion del uso
de interlingua in le rete, de usar Google in Interlingua pro lor
recercas quotidian. Un modo de facer isto es configurar le pagina de
Google in Interlingua como le pagina de initio in vostre navigator:

http://www.google.com/intl/ia/

In ultra, il es un bon idea configurar Interlingua como le lingua de
interfacie in le pagina de Preferentias, a fin que Google se monstra
sempre in interlingua si le lingua non es indicate explicitemente in
le adresse.[*]

Finalmente, le usatores de un systema operative Windows de Microsoft
e del navigator Internet Explorer trovara multo utile le Barra de
Utensiles Google (Google Toolbar): http://toolbar.google.com/intl/ia/
- un instrumento que se installa in le navigator, rendente
accessibile tote le functiones de Google instantaneemente ab
qualcunque pagina web. In interlingua, naturalmente.

Le uso massive de Google in Interlingua monstrara a Google que
Interlingua es in demanda. Alora usa lo cata die!

In le interim, io continua a traducer nove elementos del interfacie
de Google quandocunque rendite disponibile. Justo heri io traduceva
25 nove messages pro le paginas de adjuta.

- Martijn

[*] Nota pro technophilos: le lingua se indica in le adresse como:
"intl/ia/" o "&hl=ia", ubi "ia" es interlingua, "en" es anglese, etc.
(codice ISO 639, http://www.oasis-open.org/cover/iso639a.html). Il es
possibile cambiar manualmente iste codice de lingua in le adresse pro
cambiar instantaneemente le lingua de interfacie.