Kjell Rehnstrom explica le insufficientias de su nivello in lingua francese
per le incapacitate de su professores. Que on me permitte de defender mi
collegas scandinave, como io defenderea mi collegas de omne paises.

Il es ver que, si io ha incontrate plure estranieros qui parlava tanto ben
le francese que io les haberea credite compatriotas, nulle inter illes lo
inseniava. Isto tamen se comprende perfectemente: salvo in le casos de
gravissime masochismo un homine exceptionalmente dotate pro le linguas
extranier prefere utilisar su qualitates in professiones melior pagate e
minus discoragiante. Mi proprie filia parla le german tanto ben como le
francese e, in anglese, ha semper essite le prime in su classe, mesmo post
le "baccalauréat": quando io la ha suggerite de devenir inseniante, in
anglese o in german, illa ha refusate energicamente; mesmo un cathedra de
professor in un universitate non la interessarea.

Nonobstante, le inseniantes ha generalmente multe de conscientia
professional et face lo que illes pote; per infelicitate reformas demagogic
ha jectate in lor classes infantes inapte al studios, cuje unica reaction es
de rider de lo que illes non comprende. In tal conditiones, melior parla un
inseniante de lingua estranier, plus su cursos son perturbate; plus un
infante proba de parlar correctemente, plus ille deveni ridicule ante su
condiscipulos.

Io adde que le majoritate del parentes repete al lor infantes: «Lo que tu
inseniante te apprende in le schola es completemente inutile: post le
"baccalauréat" tu pasara du menses in Londinio e tu parlara melior que
ille.» Troppo, anque, denigra continualmente le populos estranier, sin
comprender que un alumno desira nullemente apprender le lingua de homines
que ille trova odiose o ridicule.

Io conserva le plus grande respecto pri mi defuncte parentes; sed isto non
me impedi de judicar le education que io ha recipite de illes. Si una del
inseniantes de mi filia parlava de su "extraordinari capacitates
linguistic", le motivo es que io ha facite grande attention pro non refacer
le mesme errores. Que senior Rehnstrom repensa a su infantia e se demanda si
su inseniantes son le sol responsabiles de su mal nivello in francese.

Bernard Aunis