Le 26 de april 1986 era un quiete die in Uppsala. Mi urbe es situate alcun 100 kilometros del
centrala energonuclear de Forsmark. In ille die le radio local (Radio Upplandia) alarmava le
publico que il emane radioactivitate de Forsmark e tanto distante que Uppsala omnes se
preparava de evacuar le citate. "Nunc le diablo es a pede libere!" ego pensava. Le radio
diceva a omnes attender.

Post alcun horas, quando on, secundo le medios, habeva evacuate tote le travaliatores de
Forsmark on constatava que le radiation non veniva de ibi. Forsan de Finlandia?

Finlandia habeva nulle information. Le ventos habeva essite sud-oriental. Forsan del reactor
Sosnovyj Bor proxime al presente Peterburg. Non de ibi. Il se dice que le svedese firma
Satellitbild (Pictura satellitari) habeva detegite fumos veniente de un loco Chernobyl a
Ucraina.

Per le ventos, e le facto que le regiones sud del parte principal de Svedia que se appella
Norrland (*Nordia) recipeva precipitation in forma de pluvia, un grande quantitate de
decadita radioactive se atterrava justo ibi. Isto contaminava le vegetation, e le proxime
annos on non poteva mangiar omne fructos, bacas, fungos etc. Le carne del rennos (rangifer
tarandus) era tanto immanducabile como invendibile. Le vaccas non poteva pasturar in aere
libere et on se timeva multo de consequentias incontrollabile.

In cata communa il era possibile donar fructos del natura (bacas etc) a controllo del
radiation. Le gente apprendeva que es le unitate Becquerelle. "Ego non pote mangiar iste
fungos, proque il ha becquerelles in illos", era un solite dicto.

In facto iste terribile occasion que habeva devastante consequentias al personas que suffreva
lo, me rendeva multo plus amicabile al fortia nuclear. Le ration de isto es que si il esseva
un _ver_ timor del fortia, le gente in principal esserea plus inclinite a fontes alternative
de energia, como illo del vento o del sol, ma quando on vole construir centralas de fortia
"ventil" (?) le humanos se plange, "Ille molinas de vento energogenic es tanto fede!"
(Durante que on ama le molinas de vento in Nederland, que es tanto pictoresc!) Le vaccas que
produce le gaso biologic es anque terribile, produce tanto de mal odor!)

Un plus grande risco al humanos individual face le emissiones de radon in le casas de viver
in multe urbes svedese. Ma lo que on non vide, e lo de que on non parla, non existe!

In nostre dies con un bon technica on pote proteger humanos contra le riscos del energia
nuclear ego crede. Le grande risco es quando on ha disassemblite le fabricas e le necessitate
de controllar non plus es tanto importante, e quando le politicos cade in le somno lethargic
e on pote economisar pecunia non monitorante le sitos ubi il ha le residue radioactive, tunc
il es tempore sonar le campanas de alarmo.

Ben maneate le energia nuclear es un del plus por energias.

E si on non ama isto, il ha altere energias. On pote usar gas hydrogenic, on pote usar le
vento e le sol. Ma nostre eligitos non sembla esser interessate!

Cellus, deveniente plus in plus cynic et misantropic!