Car amicos,

Con crescente interesse io ha legite le messages de Stan,
Josu, Lars e Martijn. In facto io es inclinate a reager a quasi
tote le punctos de lor contributiones al debatto. Ma nunc io
vole restringer me a quatro punctos que, in mi oculos, me pare 
le plus importantes in iste momento.

1. Que io comencia a dicer que io comprende le frustration enorme 
de Martijn. Ille exprime sentimentos que anque io ipse habeva 
in le curso del ultime annos. Ben que io crede que in general 
io ha ben succedite a non monstrar los, vos ha potite, sin dubita, 
recognoscer in mi messages, de tempore a tempore, indignation 
super le tentativas tenace de alcunos qui se effortia de ruinar le 
fundamentos de interlingua.

2. Essente active como venditor de libros de interlingua, io entra
in contacto con personas qui vole apprender e usar interlingua.
Io pote offerer a iste personas interessate nostre material didactic, 
como p. ex. le excellente curso de Ingvar Stenström, recommendar le 
membrato del UMI, proponer de leger Panorama e le textos in interlingua
trovabile in i.a. le sito del UMI e le sito de Interlingua-Nederland,  
ma io hesita de recommendar INTERLNG, nam pro novicios lo que
illes va trovar super le paginas de INTERLNG pote esser solmente un 
grande desillusion.

3. Le grande publica non va comprender que plus de un medie 
seculo depost le publication de interlingua certe personas, qui se 
nomina interlinguistas, continua a voler cambiar le fundamentos
del lingua, proponente le introduction de formas subjunctive, le 
creation de grande series de duplettos, etc. Certemente le publico 
se pone le question: Que es iste lingua, que non es complete, 
iste lingua defective? 

Proque nos nos occupa ancora del base (Martijn dice 'skeleto') del 
lingua? Proque non essayar de exploitar e extender le expressivitate 
de interlingua, como Martijn lo monstra in le linguage convincente 
e passionate de su messages? 

4. Clarmente Martijn ha explicate que interlingua NON es un sorta de 
continuation del latino vulgar, dunque del latino parlate in le formas 
diverse de su multiple dialectos, ma que interlingua se basa in prime loco 
super le latino classic, con grande influentia del greco. Il es iste latino 
classic que depost le ultime seculos del medievo usque a hodie ha livrate 
al scientistas, scriptores e poetas le basic material lingual pro le creation 
de cento milles de nove vocabulos neolatin e grec, que nunc pullula in le
linguas moderne del occidente. Le resultato del activitate lingual de iste 
intellectuales es nostre interlingua!

Salutes amical de
Piet


--
Archivos e disabonar: http://listserv.icors.org/archives/INTERLNG.html