Interlingua pur.

Gratias Erik e alteros, pro bon parolas recente.

Inter le listas de discussion in Internet alcunes es aperte (phantastas e personas de senso commun ha equal derecto de participar). Alteres es claudite (solmente pro personas selecte, invitate).

Recentemente io ha jocate con le idea que on instituerea un lista "semi-aperte", principalmente pro personas qui labora activemente pro le propagation de interlingua e aspira a un usage correcte, traditional ("orthodoxe") e relativemente uniforme, de illo in dictionarios, manuales, litteratura, presentationes public etc.

Le lista esserea in principio aperte, ma solmente pro illes qui consenti a un declaration de base, que poterea dicer p.ex. i.a.:

Io declara:

    - esser in favor del uso de un interlingua basate "orthodoxemente" super le criterios de IALA e le usage general de interlingua durante su prime annos.

    - esser in favor que interlingua mantene un relativemente alte uniformitate in dictionarios, manuales, litteratura, presentationes public etc.

    - esser de accordo que un majoritate del membros, o le gerente del lista, pote excluder me, si io non me conforma a su scopo general.

    - que io altemente favora un uso tanto correcte como possibile de interlingua. Io promitte prestar attention meticulose al texto de mi contributiones ante inviar los al lista, e io approba - mesmo demanda - que le altere membros me face attente de eventual errores o dubitositates in illos.

Commentos al idea? Io ipse ancora vacilla, non sape certemente esque io lo trova bon o non, e in omne caso io non essera le practic fundator/gerente de un tal lista.

Bent