Io es tarde  in leger le messages de interlng durante iste septimana
passate.  Assi isto es tarde in responsa a altere remarcas aqui:

Le theologo protestante Paul Tillich in su Theologia Systematic ha
arguite que a pensar que Deo es un esser que existe in alcun loco
in le universo es le prime passo verso le atheismo.  Il non ha un
tal esser omnipotente in le universo.  Deo non "existe". Tote le
argumentos contra le existentia de Deo es valide.

In certe respectos io pensa que Tillich ha affinitates con le mysticos
qui ha arguite que le Deo es incomprensibile, ultra le pensata. Ille
esserea compatic con le buddhista zen qui responde al question del
novicio, "Maestro, que es le senso del vita?" per batter le super le
capite o per remarcar "Vide le ocas volante al sud!"

Pro Tillich Deo es le preoccupation ultime del homine. Deo es le
objecto de tal preoccuption in questiones como "Proque ha il alque e
non nihil?" "Proque debe nos morir?" "Que debe io facer con mi vita?"
"Que es le senso del vita, del existentia?" Mais tal questiones non ha
un responsa in le senso que il ha un altere esser que es le ration pro
le cosas que es. Tal questiones concerne le choc in recognoscer que
il ha alque e non nihil, un mysterio, in recognoscer nostre finitude
e eventual morte, in le possibile insignificantia de nostre vitas,
de lo que nos face in nostre vitas.

Tillich scribeva: "'Deo' es le responsa al question implicite in le
question implicate in le finitude del homine; ille es le nomine pro
aquelle que preoccupa le homine ultimemente. Isto non significa que
primo, il ha un esser appellate 'Deo' e alora le demanda que le homine
debe esser preoccupate ultimemente con ille.  Illo significa que
qualcunque preocupa un homine ultimemente deveni deo pro ille, e
conversemente, illo significa que un homine pote esser preoccupate
ultimemente solmente super lo que es deo pro ille.  Le phrase 'essente
ultimemente preoccupate' indica un tension in le experientia human."

Pro Tillich Deo non es un esser, mais le 'poter de esser', que
esser resiste non-esser in le facto que il ha alque e non nihil.
Le amor es e le symbolo de aquelle poter e le participante in aquelle
poter, proque le amor es le affirmation de esser sin qualification.
Le 'amor de Deo' significa que tote esseres es affirmate per lor
existentia mesme. Deo pro Tillich es le fundo de esser, le mysterio
de existentia, le un con que nos es unite per nostre proprie esser.

Theologicamente,
Salute!
Stan






Stan Mulaik