iPod pro le iMacs

Novas ab Cupertino, California, le Compania
de "Apple Computers" nunc offere al publico un
apparato musical pro le cargamento e
immagazinamento de cantos e musica.
Le parve apparato functiona con le formato
digital pro compression musical appellate MP3,
e illo es appellate le "iPod". Illo solmente functiona
con computatores de Apple e con le programma
 iTunes2. Le apparato costa USD$399.

Malgrado le economia debile, alcun analystas dice que
iPod sera benvenite per le usatores de computatores
"Power Macintosh" de Apple, (il ha, se estima, 7
milliones de illes qui ha le equippamento necessari
pro usar le nove apparato).

Le parve apparato, non plus grande que le mano de
un adulto, transferi le information ab le computator
pro medio del cablo "FireWire" (Cablo-Foco), un
methodo de connexion plus rapide que le USB que
veni con multe del nove typos de computator. Tanto
rapide es le transmission que un CD plen de musica
solmente necessitarea de 5 a 10 secundas pro discargar
le musica al iPod. In contraste, con un connexion via
USB le mesme quantitate de information digital
necessitarea 5 horas.
Le apparato functiona e appare al usator como un
extra disco-dur pro computatores de Apple que
ha le systema de operationes  "Mac OS 9.2.1" e
"Mac OS X Version 10.1", e assi es multo facile pro
usar. Le cargamento del batteria es facite al mesme
tempore que le apparato discarga information e le
batteria functiona pro 10 horas. Le capacitate del
apparato como disco-dur es de 5 gigabytos.

Le Chef de Apple Computers, Stephen Jobs, promitte
que le consumitores de apparatos electronic tosto habera
plus de iste typos de apparatos pro entertenimento
usante technologia computatorial. Con iste plan de progresso
Apple pare voler augmentar le percento del mercato
mundial de compras computatorial, (lo qual se estima actualmente
a 5%). Assi illes vole seducer plus personas a usar le productos
Mac e retener a illes qui usque nunc son inamorate con iste sexy
compania computatorial que es sempre al moda.