Heri matino il nivava. Le temperatura era circa 0
grados Celsius (32 grados F). Profylacticamente io
disnivava le vietta ante le porta de mi
appartamento. Durante le die le temperatura de c:a
3 grados C liberava nos del nive totalmente. Il
habeva mesmo sol! Hodie del altere latere il ha 8
grados, il ha nubes. Nulle herba verde. Nulle
folios in le arbores e il ha risico de nive de
novo, dice le meteorologos del Instituto Svedese
pro hydrologia e meteorolia al urbe Norrköping.
(Sovente in bocca popular appellate Peking, lo que
non es tanto mal si on considera que Peking
(Beijing) se dice significar Le capital del Nord,
durante que Norrköping significa le Urbe nord).

Officialmente nos saluta le primavera le 30 de
april. Isto es le vigilia de Valpurgis. In iste
die le tote urbe essera in un athmosphera de
carneval. Le studentes se amusa per un concurso de
navigation in indepentemente fabricate vehiculos
aquatic - multo amusante - e le population juvene
se amusa in jectante varie cosas in le fluvietto
Fyris!

In le vespere un significante parte del population
se collige circum le ignes (focos) pro cantar
cantos al primavera e jectar cosas pro comburer in
le igne. Ma justo nunc nos solmente nos senti
private del precursores de un primavera que nos
credeva jam haber vidite. Ma non. Le prognosticos
parla de calor super Polonia e Germania nord, ma -
diceva le senior del tempore, iste aer debe primo
passar le aquas del Mar Baltic le quales ha un
temperatura de + 4 grados C. Alcun 200 kilometros
desde Uppsala il ha nivate 10 centimetros de nive
le nocte passate. In le nord il face frigido (- 15
grados C. )

In le sud del Union Europee il ha jam plus que 20
grados!

Hibernalmente