DISNODANTE LE NODO DEL RETE
Ex-gitarrista brasilian inventa accesso al Internet via radio e face
negotios con Bill Gates.

Tu sape aquelle ruitetto enoiose que le modem face sempre que tu entra in
le Internet? Ciao. Si il dependera del analysta de systemas e musico ? non
necessariemente in iste ordine ? Sérgio Cabral, tosto tu non necessitara
modem, multo minus occupar le linea telephonic del familia pro navigar. Tu
e-mails volara directemente de tu computator usque le providitor e de la,
via satellite, al mundo, cargate per veloce undas de radio. Perque necuno
pensava a isto antea? Il es como le ovo de Colombo o, in le caso, de
Cabral: il es facile post que on discoperi.

Cabral es un exemplo de homine correcte, in le loco correcte, in le hora
correcte e, supertoto, reguardante al loco correcte. Toto comenciava in
januario de 1991, durante le Guerra del Golfo Persic. In aquelle epoca con
28 annos, ille administrava un interprisa de sotware. Durante que totes
spectava le television, stupefacte con le poter militar statounitese, ille
prestava attention al technologia per detra toto. Filio de un locotenente
colonello del Fortia Aeree Brasilian, ille habeva accesso a consilios
privilegiate. Ille apprendeva, alora, como le statouniteses faceva pro
reciper informationes confidential durante le combattos. "Illes usava
radios libere de interferentia, con undas de extreme precision", ille
conta. Cinque annos depois, veniva le fulmine: perque non usar le mesme
technologia pro accessar le Internet? Ecce, Cabral habeva facite le ovo
star.

ISTE ES PRO SONAR IN LE RADIO

Comparar le connexion per radio con le modem es como confrontar un avion
con un skate. Per le undas hertzian, le datos circula a 3.000 kilobits per
secunda, 107 vices plus rapido que lo que permitte le modems de 28,8
kilobits. Le avantages de iste differentia es varie. Mais le melior es que
toto aquello ja ha exite del papiro e ha devenite le Rede Omega, le
interprisa create per le ex-gitarrista como providitor de accesso al
Internet, in octobre, al citate de Curitiba.

Cabral pote facer Brasil esser discoperte per le rete mundial. In le mense
passate, ille monstrava su systema a Bill Gates, le presidente de
Microsoft. Ille exiva de la con un vaste surriso e un contracto pro le
prime vendita electronic, ancora iste mense, de un producto del Microsoft
per su interprisa.

Malgrado de un subjecto qui habe un tal idea on expecta que ille solo pensa
a bits, Cabral prefere, mesmo, esser appellate rockero. Ex-studiante de
Physica, Mathematica e Ingenieria al Universidade Federal do Rio de
Janeiro, le inventor al fin se ha graduate in Analyse de Systemas.
Nonobstante, le grande orgolio de iste inventor es haber passate le
postmeridies de adolescentia sonante con Herbert Vianna e Bi Ribeiro, ante
que illes deveniva le [banda] Paralamas do Sucesso. Con le tempore, ille
finiva cambiante le gitarra per le musica electronic. Il es probate que il
non es solo con rock que on face successo in le radio.


VELOCITATE MAXIME
Intende como functiona le Internet per radio.

1. ADEO AL MODEM. Le configuration minime del computator es un Pentium 100,
con systema operational Windows 95. Le modem e le linea telephonic deveni
innecessarie. In vice de illos, tu necessita un equipamento special que
permitte reciper e transmitter datos per radio.

2. CELO AZUR. Tote le datos que arriva e exi de tu computator naviga per le
aere in forma de undas de radio. Le cammino del informationes es le
radiofrequentia inter 2,4 e 2,48 gigahertz, liberate per le governamento
[brasilian?].

3. DE CASA AL MUNDO. Captate e retransmittite per antennas, le undas
attinge le "backbone" ? spina dorsal, in anglese ?, le central de
telecommunicationes que liga tu providitor al resto del mundo via
satellite.


PACCHETTO BASIC
Iste es le equipamento special distribuite per le Rede Omega.

Tu computator recipe un carta de rete special pro entrar in contacto con le
providitor. Illo gania un radio israeli Breezecom, del grandor de un mus,
que substitue le telephono, pro transmitter e reciper informationes.
Accopulate al computator, un antenna face le ponte inter le radio e le
central de accesso.


AL CRESTA DEL UNDA
Como le datos surfa per le aere.

Toto que tu computator intende es bits. Con le modem, illos deveni signales
de telephono. Le lineas telephonic congestionate non suffice pro le
volumine de datos que circula per le rete. Alora, le apparato que tu
accopula al computator transforma le bits in undas e fuge del
imbottiliamento. Le avantage del nove systema es que, in aquelle banda de
radiofrequentia, non existe interferentia.


UN GIGANTESC DIFFERENTIA
Vide le avantages de haber un connexion 107 vices plus veloce.

DIVERSION GARANTITE. Surge un luce al fin el tunnel pro le webtelephonia,
le programmas ligate a cameras de video que transmitte le voce e le imagine
del usuarios. Hodie le imagines appare a tres quadros per secunda e le
subjecto qui parla con te pare un robot. De su latere, le qualitate del
imagine transmittite per undas de radio se equaliza a aquelle del
television, con trenta quadros per secunda. Iste rapiditate tamben aperi le
portas pro le television per le systema "pay-per-view" ? in le qual tu paga
per le transmission del programmas.

PASSE DE MAGICA. Un del principal querelas del majoritate del internautas
es le lentitude del Internet pro copiar programmas, que generalmente es
archivos grande. Le Encyclopedia Britannica occupa le 640 megabytes de un
CD-ROM. Copiar lo per le Rede Omega prenderea circa un medie hora.

INTERNET PORTABILE. Le connexion per radio permitte que tu usa un notebook
e naviga in movimento. Le differentia es que assi il es multo plus rapide e
plus incostose que le forma usate actualmente, per telephono cellular. Le
systema functiona sin problemas si tu te move a usque 90 kilometros per
hora.

---
Traducite de Revista SUPERINTERESSANTE, Brasil, Decembre de 1998
Ensjo.