On 2/4/07, Alberto Mardegan <[log in to unmask]> wrote:
>
> Interlingua es un lingua, esperanto un religion. :-)
> Io ha nihil contra esperanto e esperantistas, ma in le maxime parte del
> casos le esperantistas vide in interlingua un rival periculose e cerca
> de non dar visibilitate a illo.

Io sape de (un minoritate de) personas aqui in iste lista que age como
si Interlingua tamben esseva un religion. Mais io non mentionara
nomines pro non violar principios de etiqueta. Isto demonstra que
personas fanatic -- felicemente, un parve minoritate -- existe in tote
le partes.

Ultra isto, il non es ver que tote le parlantes de esperanto seque le
movimento esperantista como un doctrina de maniera fanatic. Ilos es
solmente un parte -- parve, mais multo ruidose -- del "finvenkistoj"
("finvenko" = victoria final). Un altere parte del esperantistas es
plus aligneate con le grupo del "raumistoj", que considera Esperanto
como un interessante hobby -- del mesme forma que multes de nos
considera Interlingua como un hobby salutar --, e solmente desira
disvelopar le cultura proprie esperantista, con literatura, videos,
teatro, artes, etc. Io non vide ule problema que pote esser causate
per le tendentia "raumista". Al contrario, io vide un excelente
oportunitate pro nos performar intercambios cultural con ilos, que
solmente inrichirea ambe le comunitates.

Ultra isto, varie "finvenkistoj" non es fanatic. Multe de ilos
imbrachia lor causa solmente como un ideal politic, mais sin
fundamentalismo radical. Il ha alicun individuos "finvenkistoj" que
possede excelente relationes con me e con altere interlinguanos. Io
simplicemente non alignea con iles in le direction politic, mais nos
pote esser amicos sin problemas.

Mi mensage es que nos non pote generalisar le parlantes de esperanto
como si tote ilos esseva fanatic. Prejudicios non es bon al
conviventia human. Nos debe sempre rememorar que ilos es tanto human
como nos. Isto es mi mensage de pace.

> Il ha personas qui sape sia esperanto sia interlingua, e usualmente
> illes es multo rationabile -- ma infortunatemente illes es pauc!
>

Si, ilos es pauc. Alicun de ilos es subscripte a iste lista, e io
considera los multo benvenite a conviver con me. Mais io crede que
declarar que tote le esperantistas es fanatic ofenderea le personas
que parla ambes Interlingua e Esperanto. Io non volerea esser inimico
del personas. Il es un question de foro personal aprender multe
linguas, e si un persona del comunitate de Interlingua desira aprender
francese, anglese, japonese o esperanto, io lo incoragiara, proque
aprender plus linguas amplia nostre vision de mundo e face con que nos
possede plus oportunitates de contactos pro obtener amicitates
international.

Viva le diversitate! :)

Antonielly Garcia Rodrigues

--
Archivos e disabonar: http://listserv.icors.org/archives/INTERLNG.html