d[070619] x[Kiviaho Allan] z[KivA-G6Ioa] r[AlbC-G6A]
s[Re: Chacos e interlingua]

[log in to unmask]
[log in to unmask]
NORDia

Amicos interlinguistas - chachistas - birgittin(a/o)s,

---------------------------------------------------------------
Carlos Alberto 070611: Io ha navigate per le surprendente sito
http://www.interlingua.fi/kiva/kivachac.htm
ubi io ha apprendite que le senior Allan Kiviaho era (e debe de
esser ancora hodie, io suppone ...
- - -
Carlos 070527: Io es quasi del ... etate [de] 74 annos, ... [*]
------------------------------------------------------|--------

Salute Carlos e multe gratias pro tu parolas amical!

[*] Io es surprendite que tu ha jam 74 annos, io ha
solmente 71 annos e es, talmente, un viro
relativemente juvene :). Tu scribe interlingua
excellentemente!

Io crede que Argentina es le plus forte pais in chacos
(Miguel Najdorf, Oscar Panno et alii).

Sed Brasil ha un chachista multissime talentose,
Henrique Mecking, nascite in Santa Cruz in 1952. Ille
era jam in etate de 11 annos le campion de Brasil, in
1971 ille deveniva granmaestro international e ille
era duo vices un candidato del campionato mundial, in
1977 le tertie in le lista de classification de optime
chachistas in le mundo, post Anatolij Karpov e Viktor
Korcznoj. Infortunamente ille era seriemente malade
in 1979-1991, alteremente ille poterea esser campion
mundial.

==============================================
Mi si-nominate carriera como jocator de chacos
==============================================

Io comenciava jocar chacos como comparativemente
vetule, in 1952 in etate de 16 annos. Desde 1968,
quando nostre prime infante nasceva, io non plus
jocava chacos con maxime ambition.

Mi club de chacos (Helsingin Shakkiklubi - Club de
Chacos de Helsinki) ha nunc 121 annos e io ha essite
un membro de illo durante 54 annos.

In 1982 nos era victoriose in le campionato de
Finlandia in chacos de super le tablo e chacos
correspondential. Pro isto nos viagiava in 1983 a
Beograd, Yugoslavia, pro jocar un match del Coup de
Europa contra "Crvena Zvezda" ("Stella rubie"),
famose etiam como un forte club in calcio.

===============================================
Le match immortal in chacos inter Vanda/Vantaa,
Finlandia e Vadstena, Svedia
===============================================

Vide
http://www.interlingua.fi/umi/vadstena/vadstena.htm
e clicca
- Le epic match in chacos

Io me emergeva como un grande maestro - in papiro :)

Io ha ancora al minus un ambition in chacos: A esser
un forte jocator del chacos blitz in etate de 80
annos, como un legendari maestro international svedese
Erik Lundin ante alicun decennios ...

Un reporto de torneos de blitz de nostre club de
chacos, vide (in finnese ...):
http://www.kolumbus.fi/allkiv/hsk/hskbvg.htm
Clicca
- HELSINGIN SHAKKIKLUBIN vuoden 2007 sankarikilpailu

===============
SANCTA BIRGITTA
===============

Visita al campus del monasterio de Sancta Birgitta in
Vadstena era un experientia multissimo interessante.

Io presentava illac un discurso humoristic (al minus
illo era intendite de esser humoristic ...) super le
thema. Vide
http://www.interlingua.fi/umi/vadstena/vadstena.htm

Imponite per le monasterio del Sancta Birgitta in
Vadstena io e mi sposa Brita-Lisa ha visitate etiam le
ruinas del monasterio de Sancta Birgitta ("Pirita") in
Tallinn, Estonia, que le
*** TZAR BARBARIC russe Ivan le Terribile
destrueva in le 16e seculo.
... hm ... hm ... hm ...
Durante le 16e seculo etiam le monasterio de Sancta
Birgitta in Vadstena era destruite per le
*** REGE BARBARIC svedese Gustaf Vasa ...

Nos deveniva multo enthusiastic quando nos trovava
reclamo pro le Festival de Sancta Birgitta in augusto
2007 (le 600e anniversario del Monasterio Pirita) in
Tallinn.

Heri nos visitava Tallinn, con le lente e vetule nave
"Nordlandia". Iste vice le nave era completemente
plen, proque un unitate de displicamento rapide ("Fast
Deployment Force") del armea finlandese viagiava super
Estonia e Latvia a Lituania pro participar illac a
manovras militar. Nos stava sin jentaculo proque le
restaurante era occupate per le soldatos ...

Le tempiere era extrememente humide sed il non
pluviava fortemente. Quando nos voleva procurar
billetes al Festival de Birgitta in le Theatro
"Estonia" nos era "jectate" via proque le theatro era
reservate pro un funeral. Nos continuava a nostre
perrucchero "del corte", Irene. Post illo nos visitava
de nove le theatro e poteva comprar le billetes.

Vide
http://www.interlingua.fi/umi/vadstena/piritadx.htm

Nos seligeva le duo pecias de ballet, "Suite de
Carmen" e "Le Bolero" de Ravel. Le Bolero retorna me
memorias del anno 1956, quando le insurgente hungaros
battaliava a stratas de Budapest contra le occupatores
sovietic. Io i.a. videva un pelicula documental de un
hora, ubi iste Bolero de Ravel sonava per tote le
pelicula. Ben, al monasterio de Pirita le bolero es
presentate per un compania russe e illo ha nihil a
facer con guerra.

Heri nos viagiava etiam a Pirita pro reservar un
camera in le nove monasterio de Pirita pro le nocte
18-19 de augusto 2007. Le programma fini ca. le 23
horas e nos non placeva le idea de viagiar in nocte
con autobus retro a Tallinn ab Pirita. Nos sonava un
campana ante le muro del monasterio. Un camera de
video tractava nos longe ante que un dama demandava
per altoparlator qui nos era e que nos voleva. Post
que io expliceva que nos era touristas finlandese qui
voleva reservar un camera le porta aperiva e la dama
instigava nos venir in. Un multo amical e allegre
monacha appareva in vestimento de birgittinas. Illa
appareva esser un dama ex America del sud. Nos
discuteva in anglese. Illa scribeva sin ulle altere
formalitates nostre reservation in un quanderno e
diceva: "Alora, benvenite retro in augusto!"

Nunc nos attende con grande impatientia iste evento
gaudiose e interessante.

Salutante

Allan Kiviaho

--
Archivos e disabonar: http://listserv.icors.org/archives/INTERLNG.html