[STAN MULAIK :]
> Post scriptum:  como se dice le parolas svedese sin vocales?

Il non ha parolas sin vocales in svedese, es un problema computatori.
Nostre tres litteras national, 'A' con duo punctos, 'O' con duo punctos e
'A' con un circulo, sovente es massacrate per computatores american, usante
le ASCII de 7 bits, que pote solmente representar le litteras A-Z.

Dunque, le parola svedese pro 'leger' es 'lasa', con duo punctos supra le
prime 'a'. Iste littera es pronunciate approximativemente como le vocal in
le anglese 'have' o in le francese 'faire'.

In adresses de e-posta on non pote usar iste tres litteras, lo que a vices
crea parolas amusante. Il ha un programma in le radio svedese, appellate
'le lingua', in svedese: 'spraket' con un circulo supra le 'a'. Illo tracta
questiones lingual. Ma si on vole inviar e-posta a iste programma on debe
omitter le circulo. Le parola 'spraket' sin le circulo significa 'le
crepitar'!

- - -

Ma si, quando io pensa un poco, il vermente existe un manata de
interjectiones e "quasi-parolas" que manca un vocal:

Mm = Si (como anglese 'u-huh'; le parola "correcte" es 'ja')
Hmm = "Io pensa"
Shh! = "Tace!"
Tss! = "Io non lo crede!"

Io crede que le ultime tres es international.

Quando io era un puero e io respondeva per "mm" a un question de mi matre,
illa sempre demandava: "Esque 'mm' significa 'si o 'non'?"
Io respondeva: "Mm"!

Ove

[log in to unmask]