990502. Iste lineas era transscripte, ex mi manuscripto que
io scribeva in Turchia, al nostre cabina del fin de
septimana in le foreste ubique io es con mi marita foras de
celebrationes de 990501 que nos non place del toto. Il era
inusualmente frigide in Turchia. Nunc in Finlandia nos ha
anque multo frigide, hodie al matino -2 oC quando ca.
+15 oC esserea normal in iste tempore del anno.
In previe vespere nos non habeva frigide - nos sedeva in
nostre sauna in temperatura de +100 oC. Nos bibeva bira
(danese "Faxe") e mangiava salcisias in le antecamera de
nostre sauna. Io so convincite que iste milieu in un sauna
in le foreste al nostre parve laco in un temperatura
infernal quando il es multo frigide foras clarmente
superpassa omne restaurantes "Ritz" del mundo ...
Salutante
Allan
Rhodos. Le Ordine de St. Johannes. Malta. Interlingua
-----------------------------------------------------
Rhodos ha un historia multo interessante. Illo habeva un
famose schola de rhetorica. Ipse Gaius Iulius Caesar iva
al iste insula pro apprender rhetorica grec (e latin?).
Quando le cavalleros de cruce era expellite ex Palestina in
1309 le Ordine de Sancte Johannes se installava in Rhodos
ubique illes edificava un fortalessa magnific. Le
fortalessa era restaurate per sr. Benito Mussolini in le
1930mes. In 1522 le sultan Süleiman II Magnific capturava le
insula e le cavalleros installava se in Malta.
In 1911 Italia attaccava Turchia in Africa Septentrional e
in 1912 le marina de guerra italian capturava anque Rhodos
(uno del insulas de Dodekaneses). Durante le secunde guerra
mundial Rhodos era capturate per le marina de guerra de
Grande Britannia. Post le guerra le alliatos occidental
stupeva que facer con iste insulas. Illes decideva dar
illos al Grecia que habeva luctate contra le statos de axe
in loco de Turchia que habeva essite neutral. Turchia
deveniva multo acerbe e le Dodekanes es anque hodie uno de
cosas de relationes tense inter Turchia e Grecia.
Assi, le Johannitas se installava in Malta. Io ha nunquam
visitate Malta sed sr. Juho Kallio, le quasimarito de
nostre filia e le tresorero del Association Finlandese pro
Interlingua, ha un ric amita, doctor de medicina e
philosophia in le USA, pensionate, qui habeva in Malta un
villa luxuriose. Nostre filia e Juho Kallio visitava la in
Malta. Infortunamente le amita ha vendite le villa e
cambiate a Finlandia, ex paradiso mediterranee al inferno
de frigido e nive ... Le presidente de mi club chacos, qui
es anque le patrino de nostre filio, es in Malta pro le
presente.
Le Ordine de St. Johannes e Interlingua
---------------------------------------
Io ama heraldica, symbolos romantic etc. Dunque io vole
vider un connexion del Interlingua e le Ordine de Sancte
Johannes, proque le hoste de INTERLNG es le Universitate
de St.Johns, USA.
Le fundo de Interlingua es multo catholic, proque le
nationes que parla le linguas del fonte de Interlingua,
Italia, Espania (e Mexico etc.), Portugal (e Brasil),
Francia (e Belgica, Quebec etc.) son catholic. Le numero
del catholicos in le anglophone USA es etiam bastante
grande e le scotos e irlandeses son catholicos. Il ha
multe catholicos anque in Germania, Suissa e Austria.
Mesmo Svedia e Finlandia ha essite multo catholic e multo
latin. Svedia (e Finlandia, un provincia de Svedia)
deveniva lutheran proque le rege, Gustaf Vasa, voleva
impugnar le possessiones del ecclesia catholic. Gustaf
Adolf Secunde, le celebrate campion del protestantes,
habeva un catholico le plus "nigre", cardinal Richelieu de
Francia como su intime alliato e subsidiator. E post que
le massas de soldatos svedese e finlandese habeva
morite in le Guerra de 30 annos, le majoritate de soldatos
in le armea protestante de Svedia consisteva
de - catholicos, Landsknechte german.
Le filia de Gustaf II Adolf, le regina Kristina, se
converteva a catholicismo, se abdiceva e cambiava al Papa
in Roma!
Le blason de johannitas es un cruce rubie sur fundo blanc.
Iste es anque le symbolo del Union Paneuropee; le blason de
johannitas sur le blason del Union Europee. Quando nos era
in le sala anglese del fortalessa de Bodrum/Halicarnassos
io pensava que hic se incontra le animas de ancian
johannitas gloriose e le de interlingua (le minuscule anima
de Allan Kiviaho, he-he ...).
Mi filio qui deride que io es un volapükista anque dice que
"le papa es in processo de devenir un catholico" e que
"interlingua es un conspiration de catholicismo".
Actualmente io es non-religiose, un pagano. Sed io so multo
interessate de religiones como un phenomena historic e
cultural. Io multo admira le ecclesia catholic, Roma, le
cathedral de Sanctus Petrus, le vetule parve ecclesias in
Italia e Sicilia, le Papa ex Polonia, le ecclesia luctante
del America meridional. Mesmo Fidel Castro, le grande
commandante, ha devenica un pauc catholic post le visito
del Papa Giovanni Paolo Wojtyla.
In 1986 nos visitava Budapest, Hungaria e attendeva al
missa in le famose cathedral de Sancte Stephanus. Nos
stupeva que quare le musica era representate solmente per
un parve orchestra de camera benque le cathedral habeva un
grande organo. Le explanation sequeva. Quando le missa era
finite, le organo comenciava tonar le hymno national de
Hungaria, ad initio in voce basse, al fino con crescendo
majestose. Illo era un protesto magnific del Hungaria
catholic contra le occupante Union Sovietic atheistic...
Le ecclesia lutheran es bastante anemic sed illo ha al
minus un grande hero, pastor Arvo Survo de Ingermanlandia
qui coragemente luctava pro le derectos del population
finnese de Ingermanlandia in le previe Union Sovietic.
Le ecclesia orthodoxe es pro me un opera mystic e grandiose
con musica superhuman. Unos le plus grande momentos
emotional de mi vita ha essite le visitas al certe
ecclesias orthodoxe; Le Hram (monasterio) de Svyato
Danilevski in Moskva, le grande cathedral de Alexander
Nevski in Sofia, Bulgaria, le cathedral de Varna, etiam
in Bulgaria e concertos de choros de alicun monasterios
russe. Nos nunquam oblida un missa in un multo parve
ecclesia in Romania, 1979 o 1980, quando le ecclesia
era bruschemente persecutite per le regime de Nicolae
Ceaucescu.
Sed, como un agitator de interlinguanismo, io non vole
troppo multo accentuar le christianitate in connexion
de interlingua, proque le grande amor de mi marita e
me es Turchia. Le tote communitate turc, ab Balkan a
China, parlante interlingua (e turc), ecce es mi vision.
Le scimitarra de Ümit Kiliç (Kiliç = scimitarra), le
interlinguanista ex Instanbul, o le luna crescente son
pro me si bon symbolos si le cruce rubie de johannitas.
Omne nationes del mundo, unite detra le Interlingua!
Allan
|
