Io ha habite un sonio.
Heri nocte io ha soniate que Alexander Gode trovava Alice Vanderbilt in le celo, e io poteva ascoltar le sequente dialogo inter ambes:
Alex - Estimate seniora, le situation de nostre Interlingua me sembla vermente preoccupante. Tote le effortios nostre in crear e disveloppar ille idioma auxiliar si belle e tanto simple ha producite usque nunc pauchissime resultatos. E lo que on poterea appellar le "movimento" organisate pro divulgar le lingua a pena merita le denomination de movimento - illo es plus tosto un stagnation. Nos non pote permitter que nostre Interlingua mori in tal circumstantias. Il es necesse que vos novemente apporta ressources financiari, ora non pro crear, ma pro salvar nostre car filia.
Alice - Vos ha ration. Anque io ha percipite que si alicun cambio drastic in le conduction del destinos de Interlingua non occurre in urgentia, nostre filia risca disparer irremediabilemente. Ma que suggere vos como bon investimento in terminos de effective divulgation e disveloppamento del semicentenari Interlingua? Io es disposite a financiar un campania planate con intelligentia e professionalismo, ma io non intende apportar moneta pro simplemente promover incontros e congressos que generalmente resulta in nihil practic e mensurabile.
Alex - Io pensa exactemente como vos e, si io habeva vostre conditiones financiari, io contractarea un importante agentia de marketing o mesmo un grande interprisa editorial - que on dice, pro exemplo, le Amazon - pro planar e exequer un campania basate, principalmente, super le ressources extraordinari de communication offerite per Internet...
Alice - Hmm... Vostre idea es interessante. A mi aviso, Interlingua care super toto de un insimul de actiones ben coordinate visante attraher nove adherentes - in grande numero, in plure partes del mundo, sin ulle restriction quanto a sexo, racia o religion. A proposito, io pote vider que inter le practicantes de Interlingua quasi il non ha feminas, lo que me causa un certe tristessa. Non que io sia un "feminista", ma, illo irea sin dicer, io non habeva jammais le intention de crear un lingua auxiliar international pro uso exclusive de viros (medie dozena de viros).
Alex - Alicunes inter illes, a dicer vero, se plange de iste absentia del sexo feminin ab le universo de Interlingua, maxime si on considera que le Presidente del UMI es un illustre svedesa, seniora Barbara Rubinstein. Ma, in veritate, nulle effortio seriose ha essite essayate usque nunc pro conquirer sympathisantes al causa de Interlingua inter le feminas. Assi, le campania a que io allude deberea dedicar special attention a iste puncto.
Alice - Sin ullissime dubita! Totevia, il ha, realmente, le problema financiari. Il es quasi certe que le UMI non ha moneta sufficiente pro realisar un programma de tal dimensiones. E io, hic supra, non pote provider directemente al financiamento del costose campania que vos suggere. Ma, io sape lo que io va facer. Io apparera in sonios a un par de Interlingua-istas ric e les convincera a investir lor moneta "otiose" in le constitution de un fundo - melio ancora, le creation de un Fundation pro Interlingua - que, si ben administrate, potera representar le salvation de nostre car filia. Que pensa vos de iste idea?...
x-x-x-x-x-x-x-x
Ben, car amicos e amicas. A iste puncto io me eveliava, de maniera que io non sape que altere cosas Alex e Alice pote haber tractate in ille importante dialogo.
Io vole informar que io certemente non va reciper in sonio un secunde visita del seniora Vanderbilt, proque io non es ric - mi moneta a pena suffice pro mi subsistentia. E io me permitte peter a vos, interlingua-istas ric, que vos non attende le visita de Alice, ma tosto cerca prender contacto le un con le alteres (vos sape qui ha le moneta "otiose", nonne?) pro realisar iste idea del Fundation pro Interlingua, con o sin participation directe del UMI.
Le SOLUTION pote esser a cammino.
Vostre fratre
Carlos Alberto
--
Archivos e disabonar: http://listserv.icors.org/archives/INTERLNG.html
|
