Martijn Dekker e Kjell Rehnstrom scribe considerationes diverse reguardo al
svedeses in Europa. In particular Martijn informa que su seniora se trova
ben in su nove Pais. Kjell considera le aspecto del climate como un
possibile situation de permanentia plus o minus durature del svedeses in un
pais del Sud Europa.
Reguardo al Italia io pote assecurar que un large currente del pensamento
sustene que le ver e melior vocation del Sud italian, in ultra al
agricultura e al industrialisation de alte nivello intellectual, permittite
per le optime universitates e le propension al studios de multe juvenes
meridional, sera illo que reguarda le tourismo de qualitate. In altere
terminos il se tracta de poner al melior profito le ressources del climate e
del locos in le territorios que jam constitueva le Magna Grecia.
Le structuras sanitari es jam de optime nivello.
Il se tractara de garantir mesmo un structura scholastic adequate al paises
de origine, e io pensa que isto non sera un realisation impossibile, al
contrario, un idea formidabile pro permitter longe periodos de permanentia.
Le studio non reguarda solmente le juvenes, illos interessa sempre plus le
personas qui ha cessate lor periodo de vita laborative. Hypothesar un rolo
pro interlingua il serea un aspecto nove e propositive.
Io pensa que tractar iste thema poterea esser un belle idea: villages
touristic ubi un lingua commun, de relative facile apprendimento,
permitterea longe periodos de permanentia pro le europeos.
Pro le angleses le situation in Italia ha longe traditiones de permanentia,
in particular in le Region Toscana e in mi Region Veneto a Asolo, ubi le
angleses es de casa.
Totevia in Italia, io crede, se presenta un aspecto de non facile
superamento: illo del costo del structuras de reception. Le costos italian
es alte, forsan apte al qualitate del reception, ma isto non facilita le
selection pro un longe permanentia.
Io me poneva iste demanda, alcun dies retro: perque le proxime conferentia
del UMI sera in Bulgaria e le precedente era in Polonia e ancora antea in
Romania? Io crede que al fin iste selectiones es determinate justo pro le
costos del permanentia. Un septimana in Italia in le periodo de fin julio,
initio de augusto, probabilemente haberea un costo plus elevate de al minus
cinque, o plus, vices.
Iste aspecto non presenta solutiones alternative.
A vices io me demanda: perque io non ha voluntate de viagiar majormente?
Forsan mi responsa occulte pote esser: si tu jam vive in le paradiso
terrestre, perque deberea tu renunciar a isto?
Mario, ben stabilite!
|
