Mario,
   Io es multo triste a apprender de vostre anxietate e pavor super
le maladia de vostre fratre.  Totevia, si le tumor non es maligne,
le extirpation de un ren non esserea fatal, e vostre fratre pote
viver multe annos con solmente un ren (fortunatemente le Deo ha
date nos duo renes).
   Mi patre viveva duo annos post un de su renes deveniva non
functional poste que un tumor in un ureter (le tubo del ren al
vesica que porta le urina) ha bloccate le passage.  Io opina que
ille poteva haber vivite multe plus annos si ille non ha disvellopate
un tumor in su altere ureter.  Ille moriva al etate de 92 del
fallimento del renes. In le interim ille habeva luctate contra
le cancre del vesica, que ha metastasizate se in su pulmon, mesmo
post que le cancre in le vesica esseva in controlo per therapia.
Mais il non esseva le cancre del pulmon que ha prendite le, mais
le fallimento del secunde ren.  Sub le circumstantias, pro ille,
il esseva un bon via a partir del vita, proque ille solmente
moriva in su somno.  E pro ille io non senti que le vita non
ha date le su plen mesura.
  Mi proprie philosophia es que le morte es nostre dono final a
nostre hereditarios e pro nostre specie.  Le objecto del vita es
a reproducer e continuar le vita.  Mais proque le mundo se muta
e crea nove conditiones, le vita debe adaptar se pro superviver
iste nove conditiones.  Pro isto le vita ha numerose variationes -
multe specie, e in cata specie variationes tanto ben.  Le ADN in
nostre cellulas differe de individuo a individuo, a per hazardo,
alcun individuos va possibilemente superviver in le nove
conditiones e transferer lor ADN a lor prole, que va haber le
chacteristicas requirite pro superviver in iste conditiones.
Mais pro facilitar le superviventia del proles, le previe generation
debe morir se, tal que le competition pro nutrimentos e altere
materias necesse pro le superviventia non va esser excessive
pro le proles.  Le planta frequentemente mori post producer le
semine.  Le salmon nata del mar al origine de fluvios in le
interior del terra pro generar e deponer ovos, alora illo
se mori. In veritate le natura ha evolvite genes que limita le
duration de vita, proque isto es pro le bon e superviventia de
vita. Io crede, que le morte es le dono del vita al sequente
generation que cata previe generation da, le sacrificio final.
  Mais mi pensatas super le vita e morte, in iste caso, es
prematur, io es certe, proque vostre fratre pote viver multe
annos con solmente un ren. Mais io senti vostre compassion
pro su solitude in le hospital. Visita le, si possibile, o
telephonar le post le operation.  E sape que vostre amicos
in le mundo de interlingua ha compassion con te.

Stan Mulaik