Salutes, seniores!

Ecce hic un altere pecia del "Comedias del Vita Private", de Lui's
Fernando Veri'ssimo. Le conto es un pauc longe, ergo io lo dividera in
plus que un message.

LE DIE DEL AMANTE

   Ja existe die de quasi toto. O quasi totes. Il comenciava con le Die
del Matres. Un statounidese, cuje nomine usque hodie es reverentiate
ubicunque directores de magazines se reuni, ma que in le momento me
escappa, ha essite le inventor del Die del Matres. Ille lo ha facite
pensante a su proprie matre. A ille femina extraordinarie qui le habeva
cargate in le ventre durante novem menses sin demandar un nickel, qui le
habeva allactate, qui le habeva balanciate in le cuna, habeva suturate
su vestes, habeva fortiate [o'leo de ri'cino : castor-oil] per su gorga
a basso e un vice, quando le habeva discoperite baniante le can in le
olla de suppa, habeva rumpite un coclear de ligno in su capite. Si, ille
femina qui se habeva sacrificate pro ille petente nihil in cambio, ma
qui ora exigeva un contribution mensual major perque illa era perdente
de troppo in le cursas de cavallos. Pro nihil habeva servite su
protestos:
   -- Io non pote, mamma. Le negotios non va ben.
   -- Non interessa.
   -- Nos solo gania moneta mesmo in le Natal. In le resto del anno...
   E alora su facie se habeva illuminate. Ille habeva habite un idea. Le
matre non comprendeva e diffundeva a su amicos in le hippodromo que le
filio finalmente habeva perdite le judicio que ille habeva. Ma le idea
era brillante. Ille lo ha presentate in un reunion de negotios in ille
mesme die.
   -- Nos necessita crear duo, tres, multe Natales!
   -- Attende illac -- alcuno ha dicte. -- Ma il solo habeva un Jesus
Christo.
   -- E le apostolos? Son dece-duo apostolos. Cata un non habeva tamben
su anniversario?
   -- Ma necuno sape le die.
   -- Melior ancora. Nos inventara, tote mense, le anniversario de un
apostolo. Nos habera natales tote le anno!
   Ma le idea non ha placite. Apostolo non habeva le appello de venditas
de un Jesus Christo. Mesmo assi, le idea de crear altere datas pro le
clientes dar presentes era bon. Era necessarie motivar le personas. Era
necessarie fortiar le venditas. Era necessarie ganiar plus moneta. Mesmo
si il era pro le matre perder lo in le cursas.
   -- Ille maga vetule -- murmurava ille.
   -- Que era?
   -- Io era pensante al matre.
   -- Le matre! Es illo!
   -- Que?
   -- Le matre! Le Die del Matres! Tu es un genio!
   Ha essite un successo. Necuno poterea appellar illo opportunismo
commercial, pois esser contra le Die del Matres equivalerea a esser
contra le Matre como institution. Isto choccarea totes, principalmente
le matres. Qui, como on sape, forma un societate claudite con
ramificationes international. Como le Mafia. Le matres tamben offere
protection e menacia les qui se rebella contra illas con punitiones
terribile que va ab le castration symbolic al chantage sentimental.
Pejor que le Mafia, que solo jecta le personas in le fluvio con un pauc
de cemento in circa.

   (Continua...)
--
   ENSJO : EMERSON JOSE' SILVEIRA DA COSTA
  E-mail : mailto:[log in to unmask]
Homepage : http://www.nautilus.com.br/~ensjo/
Addresse : Conj. Panorama XXI, Q. 26, C. 14
           Nova Marambaia
           66625-280 Belem - Para - Brasil
Telephono: (091) 231-5740 // +55 91 231 5740