d[000114] x[Allan Kiviaho] TchV-015 KivA-01D
s[Terroristas e patriotas]
[log in to unmask]

Victor A. Tchernavski 000105:
Clinton non applaude al terroristas in le SUA, sed ille diceva a su
"amico Boris" (ex-presidente de Russia, si jam 5 dies) que ille
non debe fortiar le tchetchenos al ordine, e Bill pote salutar a
fratres tchetchen de terroristas islamic.
Ultime facto mal, le attacco al ambassada de Russia in Liban.
------------------------------------------------------
Allan Kiviaho 000114: Car Victor, le problema de "ter-
rorismo" es complicate. Le attaccos de terroristas
islamic contra le ambassadas de Statos Unite ha essite
ancora multo plus violente. Le attacco al ambassada de
Russia in Libanon era un action de un persona private.

An le "terrorismo" de Russia contra le czeczenes ha
essite cente vices plus atroce quam vice versa? Le
potente machina militar russe ha implacabilemente
assassinate massas del homines civil, multe de illes
ethnic russos. Heri le organisation international "Le
medicos sin frontieras" protesteva Russia pro
"violationes grave a derectos human in Czeczenia". Io
suppone que tu sape que Stalin deportava tote le
populo de czeczenes durante del secunde guerra
mundial. Deces milles czeczenes moriva durante iste
exodus.

Alicun jornales russe ha presentate suspiciones que le
facentes exploder in Moskva ha essite arrangiate per
le servicio secret de Russia e non per le czeczenes
del toto. Naturalmente io non insiste que le czeczenes
non esserea capabile al tal actos sed ubi son le
provas legal? Le facer exploder in Dagestan probabile-
mente era un action czeczen sed le scopo era un domo
habitate per personas militar. A proposito, un se
demanda si le commandantes czeczen (Baszayev etc)
volerea provocar le guerra per lor attacco a Dagestan
o an Yeltzin e Putin besoniava iste guerra pro
assecurar le victoria de Putin in le electiones pre-
sidential in le proxime martio.

In re le terrorismo. Grande statos como Russia e le
Statos Unite son multo sensibile super le terrorismo.
Sed terrorismo es sovente le sol medio de un nation
parve in su lucta pro libertate contra un grande
nation grande oppressive. Le russos ha artilleria,
aviones, helicopteros, carros armate e un enorme
superioritate quantitative, le czeczenes principal-
mente solmente su Kalasznikoves plus alicun armas
anticarro arepulse e lancea-granatas. E totevia le
heroic armea russe ha del novo immense difficultates
a annihilar le combattantes de liberation czeczen. Io
pensa que le czeczenes son le plus capabile soldatos
del mundo.

Le combattantes de liberation son appellate
"patriotas" e "terroristas" o "banditos", dependente
del angulo del vista. Durante le secunde guerra
mundial le partisanos russe e yugoslav era a germanos
"banditos" sed io pensa que le grande majoritate de
russos considera illes ancora hodie como heroes e
patriotas. Le Union Sovietic, Bulgaria etc. trainava
grande quantitates de viros del paises del tertie
mundo a combattantes de liberation. Al SUA illes era
definitemente "terroristas".

Le Vietkong vietnamese era pro le russos, le
presidente Olof Palme de Svedia - e me - heroes. Quasi
tote le Finlandia considera que le terroristas irlan-
dese (usque 1922) era grande heroes admirabile benque
Anglaterra ha essite e es multo popular in Finlandia.

Le 1904-JUN-16 Eugen Schauman, 29 annos, assassinava
le governator general de Finlandia, Nikolai Ivanovicz
Bobrikov e se ipse. General Bobrikov era desde 1884
le chef de stato major del districto militar de Sankt
Peterburg. Le 1898-AUG-29 ille era nominate a governa-
tor general de Finlandia. Desde 1809 Finlandia habeva
essite un grande ducato con multe grande soveranitate
in le imperio russe.

General Bobrikov prosequeva un politica de
russification de Finlandia. Ille era supportate per
le ministro-secretario de stato von Plehwe e tote le
movimento panslavic de Russia. Mesmo le imperator,
Nikolai II, supportava Bobrikov. Un partito de
resistantia, "Le Activistas", era fundate in Finlan-
dia. Pro subjugar le resistancia le imperator
provideva a Bobrikov autorisationes de un dictator.
Ille banniva plure patriotas finlandese a Siberia.

In iste situation acute Eugen Schauman, un membro del
partito de activistas e vice-contabile al
administration statal de scholas fusilava Bobrikov con
un parve pistoletta Browning e post isto se ipse.
In Finlandia Eugen Schauman es ancora hodie
considerate como uno del nostre grande heroes
national. A russos ille certemente era un
"terrorista". Curiosemente ille era nascite in Harkov,
Ukraina. Su patre era lieutenant general Fredrik
Waldemar Schauman (1844-1911).

General Schauman era nominate 1885 a conferentiero del
ministro de guerra. 1888 ille deveniva le chef del
stato major del governator general, 1894 le guvernator
de provincia de Vasa, 1898 un senator e chef le
committee de affaires militar in le senato de
Finlandia. Ille resisteva le russification e abdicava
in 1900. Quando su filio habeva assassinate Bobrikov
ille era arrestate e accusate pro alte traition sed
liberate.

Il ha un grande mauseleo pro Eugen Schauman in le
cemeterio del parve citate Borgå.

In 1914 Gavrilo Princip, un patriota serb, assassinava
in Sarajevo archiduc Franz Ferdinand de Austria e su
sposa. Io crede que Gavrilo Princip es un heroe pro le
russos sed certemente un terrorista e bandito pro le
austrianos como anque le organisation clandestine serb
"Crna Ruka" (Mano Nigre). Io ha state sur le passos de
Gavrilo Princip in Sarajevo al sito de assassination
con mi sposa e visitate le museo (in 1966).

Gavrilo Princip itinerava in Bosnia e legeva le poemas
heroic de serbos al paisanos serb in Bosnia.
Incidentemente le poeta national de Finlandia, Johan
Ludvig Runeberg, qui ha scripte le hymno national de
Finlandia, amava iste vetule poemas serb e mesmo
traduceva illos a svedese in 1840's. Runeberg es
sepulte in le mesme cemeterio que Eugen Schauman.
Nostre filia travalia in Borgå como inseniator de
anglese in un schola de tourismo.

Fidel Castro e specialmente Ernesto Che Guevara son
heroes pro le vaste majoritate de russos sed diabolos
pro le plus staouniteses. Fidel Castro, iste vetule
El Commandante e Che Guevara son anque mi heroes,
benque io ama Turchia super toto. Io ha sympathia pro
le kurdos. Si Turchia devenirea acceptate como membro
del Union Europee, illo significarea un dramatic
melioration del stato de kurdos.

Assi, terrorismo e patriotismo son conceptos multo
relative.

Post un septimana io i con mi jornal a Praha, le
citate meraviliose ubi le populo non ha bon memorias
de russos, specialmente non desde le anno 1968.

Que Russia devenirea, alicun die, stato del ver
democratia e justitia!

Allan