Car omnes,

Io vole rememorar vos omnes del existentia del canal de chat #interlingua,
attingibile facilemente del pagina principal de www.interlingua.com. A causa
del prominentia del chat in le sito de interlingua, de tempore a tempore un
nove interessato entra le canal. Isto es un bon opportunitate pro satisfar
le curiositate de novicios e introducer les a conversationes in interlingua.
Il es un perdita a nostre causa quandocunque un visitator veni ab le pagina
principal a in un canal vacue e necuno responde a ille.

Alora, io ha decidite de visitar le canal quasi cata die, non importa si il
ha visitatores o non. Si illo es vacue, io simplemente lo mantene aperte,
durante que io me occupa de mi altere activitates computatorial. Mi
programma IRC me adverti con un signal de sono quando alicuno entra le
canal, e alora io le saluta e comencia parlar a ille. De iste maniera io ha
jam introducite alicun nove interessatos a interlingua, del quales duo es
ora parlatores.

Justo ora io parla con un studente de China qui ha studiate anteriormente le
anglese e le esperanto. Ille dice que ille ha studiate interlingua durante
solmente 30 minutas. Nonobstante ille parla a me (ora, durante que io scribe
isto) in interlingua perfectemente comprensibile e avantiate con multo pauc
errores. Su talento es vermente remarcabile.

Iste incontro es un bon illustration, io crede, de proque il es necessari
que le canal sia populate cata die con al minus un persona qui parla ben
interlingua. Il non prende multe effortio entrar in le habitude de
frequentar le canal (mesmo si illo es vacue)... alora, io spera de vider
plus de vos in le canal!

Cordialmente,

- Martijn ("McDutchie" in IRC)