Jay (le muggle), tu ha comparate le films e le libros plus exactemente
que io.  Lo que esseva mi intention in dicer que le film esseva multe
fidel al libro esseva que le films da un concrete representation pro le
mente que pare fidel al location e activitates in le libros. Io pote
leger le libros e vide le action in mi mente, usante le imagines del
films.

Certemente in facer un film le productor e director debe facer compromissos
pro salvar le costos, etc.

Il es interessante que iste libro es legite in tote partes del mundo.
Ha il un edition in arabic?  :-).

Durante Natal io ha discoperite in un joculeria pro infantes le libros
de Harry Potter e un libro super le vita del autoressa.  Illa scribe
su libros in restaurantes! Illa es divorciate con un filia de circa 12
annos.  Illa veni de un village rural in le nord de Brittania. Su familia
non esseva ric.  Hodie illa es ric ultra tote comprension!

E illa ancora scribe le resto del serie de libros, possibilemente ancora
in le restaurantes.  Hodie illa pote comprar le restaurante pro assecurar
que illa non essera evicte pro occupar troppo un tabulo!

Illa dice que illa ha planate le libros in detalio, con dossiers super
le vita e experientias e character de cata individuo in su libro.  Assi
illa pote scriber realisticamente super cata character.

In iste pais il es interessante que alcun del ecclesias fundamentalista
predica que iste libros super le magia es subversive del morales e
influentiate per le diabolo!  Le matre de mi filia affin es un bon anima,
e illa e su filia (e hodie mi filio secunde) se adhere a un denomination
fundamentalista, le Assemblea de Deo. E alcun de lor ministeros predica
que le magia es mal.  Le matre de mi filia affin non vole vider le films
e leger le libros de Harry Potter.  Io non pensa que mi filia affin es
tanto timorose del libros e films.

        Io vide le libros como un lection super le battalia inter le
bon e le mal, inter le magia blanc e le magia nigre.  E le maniera in
que le studentes in le schola del magia debe apprender lor lectiones,
los trova a vices ennuiante, e le necessitate pro le practica a apprender
le habilitate, face le magia quasi un symbolo pro le scientia, que pro
multe fundamentalistas, io crede, es como le magia a illes.  Mais on
pote referer le libros al conflictos de nostre societates inter le uso
del scientia pro le ben esser del humanitate e le uso del scientia pro
fines mal, como in le creation de armas del destruction massive.

  In certe respectos le serie de libros super Harry Potter es in le
mesme vena como le libros per C. S. Lewis, con su phantasias, que es
realmente super lectiones moral del vita.  Lewis esseva  un christian
autor e philosopho a Cambridge, io crede.

Cordialmente,

Stan Mulaik