Mario:

> Car Edo, si tu ha tempore, per favor, proba a explicar melio tu puncto de
> vista. Io non comprende ben illo que tu vole dicer. Io non comprende, in
> general, tote tu replica.

Certo. Con allegria. Pardona me pro le manco de claritate in mi mesage. Ecce un version plus clar:

1. Le idea de un universal bilinguisme - lingua maternal e anglese, non me enthusiasma.
2. Io dubito que le cognoscentia del anglese devenira universal.
3. De facto, le autor del articulo que tu ha citate argue que le potentia del cultura anglo-american commencia a declinar. Le cultura(s) dominante del seculo sequente sera asian.
4. Declarationes tal qual "Le anglese es le lingua de totes" me perturba.
5. Si le anglese serea le lingua de totes, le majoritate del habitantes human de iste planeta, haberea du linguas - le lingua proprie e le lingua de totes. Al contrario, le anglophonos haberea solo le lingua de totes. Le effecto es que io, como anglophono, non haberea un lingua proprie. Iste proposition non me place.
6.  Alcun indigenas de Australia se plange que alcun blancos tenta de appropriar lor cultura. Illes dice que alcun Australianos blanc usa le picturas e designos e contos indigene sin permission. Io ha compassion pro iste plancto
7. Quando io aude le declaration "Le anglese es le lingua de totes", mi responsa es "Qui ha date a vos le permission?". Apprende mi lingua. Vole ben. Cognosce mi lingua. Vole ben. Sed non lo appella vostre. Pro favor.

Io spera que io ha exprimite mi pensatas un pauc plus claro iste vice.

cordialmente
Edo