LE VERITATE SUPER LE COLLEGIO
Le collegio es un pluralitate de cameras ubi tu te sede per duo mille horas plus
o minus e tenta memorizar cosas. Le duo mille horas es dispersate al longo de
quatro annos. Tu passa le resto del tempore dormiente, bibente, e tentante haber
incontros amorose.
Basicamente, tu apprende duo typos de cosas al collegio:
1. Cosas que tu necessitara saper in tu vita posterior (duo horas).
2. Cosas que tu non necessitara saper in tu vita posterior (1.998 horas).
Iste ultimes es le cosas que tu apprende in classes cuje nomines termina in
-ologia, -osophia, -ica, etc. Le idea es: tu memoriza iste cosas, alora tu los
registra per scripto in parve quadernos de examine, e alora tu los oblida. Si tu
non succede oblidar los, tu deveni un professor e debe restar in le collegio pro
le resto de tu vita.
Post que tu ha essite in le collegio per un anno plus o minus, tu debe seliger
un specialization, que es le thema super le qual tu intende memorizar e oblidar
le major quantitate de cosas. Ecce un consilio multo importante: sia secur de
seliger un specialization que non involve Factos Cognoscite o Responsas
Correcte. Isto significa que tu non debe specializar te in mathematica, physica,
biologia, chimia, o geologia, perque iste themas involve factos concrete. Si,
per exemplo, tu te specializa in mathematica, alcun die tu vagara per le classe
e le professor dicera: "Defini le integro del cosinus del quadrante de un axe
binari rhomboide, e extrapola vostre resultato a cinque vertices significante."
Si tu non respondera exactemente le responsa que le professor habe in mente, tu
es reprobate.
Le mesmo es veritate pro chimia: si tu scribe in tu quaderno de examine que
carbon e hydrogeno se combina pro formar querco, tu professor va reprobar te.
Ille vole que tu le forni le mesme responsa con le qual ille e tote le altere
chimicos es de accordo. Le scientistas es extrememente rigide quanto a isto.
Alora tu debe specializar te in themas como litteratura, philosophia,
psychologia, e sociologia -- themas in le quales necuno comprende exactemente
super que le alteres parla, e que involve virtualmente necun facto concrete. Io
frequenta classes in tote iste themas, alora io va dar te un rapide summario de
cata un:
LITTERATURA: Isto involve scriber dissertationes super longe libros del quales
tu ha legite parve fragmentos justo ante le classe. Ecce un aviso super como
obtener bon notas in tu dissertationes de litteratura: Nunquam dice qualcunque
cosa que qualcunque persona con senso commun dicerea. Per exemplo, suppone que
tu studia Moby Dick. Qualcunque persona con qualcunque senso commun dicerea que
Moby Dick es un grande balena blanc, pois le personages del libro se refere a
illo como un grande balena blanc circa dece-un mille vices. Alora in tu
dissertation, dice tu que Moby Dick in veritate es le Republica de Irlanda. Tu
professor, qui es morte de fatiga de leger dissertationes e nunquam amava Moby
Dick mesmo, pensara que tu es enormemente creative. Si tu es capace de elaborar
interpretationes lunatic pro historias simple, tu debe specializar te in
litteratura.
PHILOSOPHIA: Basicamente, isto involve seder se in un sala e decider que non
existe iste cosa de realitate, e alora exir pro prandiar. Tu debe specializar te
in philosophia si tu plana consumer multe drogas.
PSYCHOLOGIA: Isto involve parlar de rattos e sonios. Psychologos es obsedite
verso rattos e sonios. Un vice io passava un semestre integre trainante un ratto
a colpar parve buttones in un certe sequentia, alora trainante mi companion de
camera a facer le mesmo. Le ratto apprendeva multo plus rapido. Mi companion de
camera ora es un doctor. Si tu ama rattos o sonios, supertoto si tu sonia a
rattos, tu debe specializar te in psychologia.
SOCIOLOGIA: Per pur manco de intelligibilitate, sociologia es indubitabilemente
le thema numero un. Io me sedeva per centos de horas de cursos de sociologia, e
legeva rolos de scriptos super sociologia, e io nunquam un vice audiva o legeva
un declaration coherente. Isto es perque le sociologistas vole esser considerate
scientistas, alora illes passa le major parte de lor tempore traducente
observationes simple e obvie intro alcun codice scientifichesc. Si tu vole
specializar te in sociologia, tu debera apprender a facer le mesme cosa. Per
exemplo, suppone que tu ha observate que infantes plora quando illes cade. Tu
debera scriber: "Observation methodologic del tendentias comportamental
sociometric de isolatos prematur indica que un relation casual existe inter le
tropismo verso le solo e formas comportamental lacrimatori." Si tu succede
mantener iste rhythmo per cinquanta o sexanta paginas, tu va obtener un grande
bursa academic del governamento.
--
ENSJO : EMERSON JOSÉ SILVEIRA DA COSTA
Homepage : http://www.nautilus.com.br/~ensjo/
UIN ICQ : 713833
INTERLINGUA - lingua auxiliar international
Info : http://www.interlingua.com/europa/queesinterlingua.html
Brasil : http://www.nautilus.com.br/~ensjo/ubi/
|
