>
>Date: Sun, 14 Nov 2004 21:24:16 +0100
>From: jo <[log in to unmask]>
>Subject: Re: Le evolution non es contra tote religiones
>
>Car Stan a me place vider le argumento de tote le punctos de vista, e
>iste es le ration per le qual io cita varie fontes, io
>ha studiate Dawkins e me place quando ille explica le biologia, me pare
>que ille ha un mente multo brillante, ma quando ille initia
>a mixturar le biologia con le ridicule conceptos del calculo del
>probabilitates (le vacca que poterea saltar usque le luna, le statua de
>marmore que poterea mover le bracio, le simias que poterea scriber tote
>le operas de Sheakspeare, etc.) a iste puncto io comencia a dubitar de
>su sanitate mental e isto me displace perque io sape que ille es un
>grande scientista, ma ille es anque un homine e su credentia al
>darwinismo le face devenir ridicule.
Io non ha legite iste libro specific per Dawkins. Assi io non es certe
como ille ha usate iste exemplos que tu cita. E io non sape tu rationes
pro rejicer su uso de iste argumentos pro illustrar su ideas. Mais io crede
que il ha plus substantia credibile in su ideas que tu possibilemente
ora comprende. Solmente per accidente io ha comprate iste septimana su
libro "Ascendente le Monte Improbabile" (Climbing Mount Improbabile)
proque io vole apprender como ille illustra le combination de variation
aleatori con le selection del ambiente, que es le base del theoria del
evolution. Isto non es un processo totemente aleatori, proque le
regularitate del ambiente in su maniera de 'selectionar' le organismos
que va superviver pro reproducer se introduce un elemento non aleatori
in le formation e evolution del specie. On pote comenciar con un population
in que le genes es equalmente probabile, e post plure generationes
in un certe ambiente, le distribution de genes va devenir non uniforme,
con certe genes plus probabile que alteres. Le question es como ille
tracta le complexification de organismos. Io crede que scientistas con
computatores ha experimentate con un joco appellate "Le Vita" in que
on simula le generation aleatori de elementos combinate in un ambiente
selective pro illustrar le 'evolution' de combinationes verso formas
plus complexe. Io vole apprender plus super isto.
>Io ha studiate Harun Yahya pro saper le opinion del musulmanes re iste
>thema, tu sape que io non es musulman e io non pote creder in tote le
>cosas que Yahaya scribe re le creation, totevia io concorda con multe
>cosas, io ha anque studiate le opiniones de altere religiosos, sia
>mormones, catholicos e Testes de Jehovah assi como non-religiosos.
Quando on studia un subjecto tractate per personas qui vermente non
lo comprende, tu apprende nihil de valuta. Le litteralistas vermente
non vole comprender lo, proque lor objectivo es a salvar lor ideas
fundamentalistic basate super lor technica de leger tote lor scripturas
in un maniera litteralistic. Il es plus importante pro illes pro salvar
lor interpretationes litteralistic que a apprender le base pro le ideas
scientific. Illes non vole usar le criterios de scientia in examinar lor
proprie ideas. Io non vermente crede que tu mente es aperite al veritate
in iste cosas si tu usa iste materias pro apprender super iste subjecto.
Le scientia non require que tu ha preconceptiones altere que super su
methodo que require le assertion de un idea disconfirmabile per evidentia
empiric e un proba de tal ideas.
>Io sta studiante le impacto del theoria de Darwin ex le puncto de vista
>sociologic, politic ultra que historic e biologic.
>E me pare Darwin ha influentiate le mundo in maniera irreversibile.
Il es ver que le ideas del selection natural ha generate misconceptiones
usate per gerentes e governamentos in le 19me e 20me seculos. Le
scientia ha discargate e condemnate iste misusos de iste idea, proque
on ha monstrate que illos non es basate super le scientia. On non pote
semper determinar lo que es 'bon' pro selection. Le ambiente non es
un persona con valutas, e le metaphora de 'selectionar' non debe
esser interpretate in le scientia de evolution in iste maniera. Si le
homine essaya de selectionar secundo su proprie valutas, ille possibilemente
va eliminar de su population certe genes necesse in le futur pro le
specie a superviver quando le ambiente se cambia. On semper vole un
variation in le population de genes.
>Ipparco e Tolomeo quando imponeva le theoria geocentric e susteneva que
>le theoria heliocentric de Aristarco
>esseva false pro post 1397 annos esser de nove sustenite le contrario
>per Copernico in 1543, iste fraude que durava ben 1397 annos
>non ha influentiate le vita del homine como le theoria de Darwin, ergo
>si iste theoria es false alora nos debe facer un honeste examine de nostre
>convictiones e haber le corage de renegar lo.
Io crede que iste conceptiones equalmente ha influentiate multo le vitas
de lor generation como le ideas de Newton, Darwin, Einstein, e altere in
le nostre. Le Inquisition ha occidite milles de personas qui ha essayate
pensar alteremente que requirite per le Ecclesia. Governamentos post le
seculo 20me ha habite multo plus poter pro destruer le societates que
le Ecclesia ha habite in le tempore del Inquisition. Le natura de ideas
non ha cambiate. Le maniera in que illos ha essite applicate ha cambiate.
Le mal abusos de un misconception de un idea non es evidentia contra le
validitate de un idea scientific.
Io recentemente ha vidite reportos de un studio in Italia in que certe
scientistas pretende que illes ha constate evidentia que un gen pro
le comportamento homosexual es trovate super le chromosoma X (XX es femina e
XY mascule). Secundo le conto on semper ha questionate proque un gen
pro le homosexualitate existe e ha supervivite, proque illo sembla non
a contribuer al reproduction de lor specie proque homosexuales tende non
reproducer lor proprie filios. Le scientistas pretende que illes ha
discoperite que le mesme gen produce in feminas un augmentate fecunditate,
e isto possibilemente es compatibile con le facto que multe copulas
lesbian produce lor proprie filios per insemination artificial. Mais io
ancora vole leger iste conto in un jornal autoritative.
E un altere facto que io ha apprendite. Il non ha in Leviticus alcun
prohibition contra le cubation de un femina con un altere femina. Le
prohibition es explicitemente solmente contra homines. Mais isto
es un altere subjecto....
Hodie io ha legite un libro "Neandertal" que es scribite per duo
expertos super le Neandertalianos. Le libro es principalmente un historia
del evidentia trovate e le varie theorias conflictente proponite per
personalitates controversial. Il es obvie que le scientia del
anthropologia es plen de homines concurrente passionatemente. Mais il
es equalmente ver que le campo ha evolvite con nove personas con nove
ideas e nove evidentia. Io esseva equalmente interessate a discoperir
que skeletos de Neandertalianos ha essite trovate non solmente in
Germania, mais in Francia, Israel, Iraq e in Bosnia. Que on trova
istos a differente sitos confirma le realitate del trovatas. Con
respecto a "Piltdown Man", un fraude, altere skeletos de illo non
jammais esseva trovate, e solmente in 1953 ha un scientista
examinate le fragmentos del cranio e mandibula e ha discoperite que
le cranio esseva human moderne e le mandibula plus antique de
un simia.
Salute!
Stan Mulaik
|
