Car Mario.

Mesmo si io apprecia tu grande labor, io totevia te preca esser plus
calme e investigar varie cosas ante de ir publicamente con critica
(positive/negative).

Certo, tu ha le derecto de cognoscer le statutos del UMI - ma alora
proque non demandar los directemente ab le secretario general del UMI?
(Del resto, il me surprende que tu non los ha legite ante de acceptar
esser representante de interlingua in Italia.) Iste statutos esseva,
post un longe labor gerite per le burgomaestro del citate nederlandese
de Heino, Ton van den Berg (eminente interlinguista e presidente del
Societate Interlingua-Nederland), acceptate ante plure annos como un
modernisation del organisation del UMI. Cata membro de un association
national es automaticamente un membro del UMI anque, si ille/illa non lo
refusa, naturalmente. UMI functiona como le "parapluvia" del
organisationes national, e le consilieros executive face un grande labor
pro coordinar le multissime cargas del organisation sur plano mundial e
national.

(E, il vale le pena memorar isto, omnes naturalmente labora sin
pagamento ma con grande enthusiasmo e talento de organisation. Cata
consiliero usa multissime tempore - e moneta personal - pro exequer su
function pro evitar que le UMI es pesate per costos. Pro isto il me
irrita quando personas simplemente critica o demanda sin comprender que
UMI functiona a causa del labores voluntari de multissime personas, qui
totevia assecura un standard si vicin a illo professional como
possibile.)

Io assi solmente pote repeter mi initio: Per favor, investiga le
questiones per contactos DIRECTE (e per isto io non crita - ma adjuta le
multitude de abonatos de INTERLNG qui non pote leger material codificate
per HTML e assi non vide le differentia inter texto cursive e
grasse...!) - per contactos DIRECTE al personas relevante. Panorama
publica in cata edition un tote pagina con nomines, adresses, e-posta,
telephono etc., dunque il non debe esser un problema trovar les! Tal
questiones non-investigate presentate in un grande foro solmente irrita
le lectores e significa un enorme labor pro omnes pro evitar que
allegationes presentate in iste foros non remane como factos in le
mentes del personas, qui totevia lege le messages.

Con mi optime salutes - e le desiro de un futur collaboration fructuose
e criticamente positive
Thomas Breinstrup