PRO QUE UN LINGUA INTERNATIONAL?


Le communication, le possibilitate de cambiar cognoscimentos e experientias, sin dubita, esseva le principal arma que habeva servite al humanitate in su lucta propter le evolution. Nostre fragilitate corporal esseva supplantate per nostre intelligentia e creativitate, cuje fructos un esser human poteva passar a un altere per le linguage.

Tal communication, intertanto, sempre confligeva in le differentia linguistic que existe inter le varie gruppos human ab le tribo ad le clan usque ad le civilisate nationes contemporanee. Nos vive, a causa de esso, usque hodie, in un mundo ubi cata esser human habita su proprie cortil, reguardante per un maniera meschin le sue interesses personal, non volente saper si in le cortil vicin on plora o ride, si on cognosce plus o minus e si uno pote adjutar o si on necessita adjuta. Le mancamento de communication, reinfortiate per le modo fragmentari que le medios usa pro informar re altere paises, genera le egoismo global, le abysmo que il ha inter le paises industrialisate del Nord e le developpante del Sud.

Un del solutiones pro celle problema es facile e omnes lo cognosce il ha alcun tempore: un lingua international neutre que promoverea le comprension, le pace e le intercambio general inter le populos. Pro que il es possibile que on concrea le blocos commercial, con su uniones doanal e monetari, ma il non es possibile facer le union linguistic neutre inter le nationes? Un responsa es que le apprentissage de linguas es un question economic considerabile in lo que lucra tanto le dominos de scholas de idiomas o le traductores in le microeconomia como in le macroeconomia lucra le pais(es) cuje lingua on insenia, nam illo essera capabile augmentar su actuation economic per le domination cultural que illo exercera super le populos qui apprende su lingua. Altere responsa es le timor que le humanitate senti ante nove defias, mesme si illos son visibilemente utile.

Tote illes qui hodie se dona al causa del lingua international e non son valorisate habera lor valentia confirmate quando le humanitate fatigar se propter arietar le capite (o le lingua!) adverso le muro del mancamento de communication. Le phrase que on tunc va auder ex le bucca de omnes, ma principalmente del indiferentistas, absentistas e depreciatores, essera: "--Como io poteva viver tanto tempore sin esso?!" Le pronomine esso illac citate on intenderea como Interlingua.

Que nos va in avante sempre!




Autor: Aender dos Santos, Vespasiano-MG, Brasil, V-VII-MMI.