Allan,
Vostre preoccupation con themas militar ha interessate me. Io suppone que
si io habitava Finlandia, e habeva le constante menacia de un aggressive
vicino a mi bordos, e mesmo un guerra contra illo, io tam ben haberea iste
thema in mi pensata. Potesser io diceva previemente que io esseva in le
Reservas del Armea 17 annos, commenciante in le guerra contra Nord Corea
quando in 1952 io vadeva del schola secundari al universitate. Io me
jungeva le R.O.T.C. (Reserve Officers' Training Corps) e simultaneemente
le reservas del armea in un unitate de un hospital general. (Un grande
numero del officieros de isto esseva professores del mie e colleagas de
mi patre, qui esseva un professor in le departimento del biologia). Io mesme
studiava le biologia e le education secundari. In 1956, quando io recipeva
mi diploma e mi commission como 2d locotenante in le artilleria, le Guerra
in Corea esseva practicamente al fin. In 1957, quando io initialmente
anticipava duo annos in le armea, io recipeva nove ordines limitante me a
6 menses, e 7 annos in le reservas. Post mi tour del servicio active, io
me retornava a mi casa in Salt Lake Citate e me jungeva un unitate de
reservas in le artilleria. Io esseva in illo circa 7 plus annos, a qual
puncto, quando io recipeva mi diploma como doctoro del philosophia, io
me transfereva a un parve unitate pro le recerca e disveloppamento, con un
assigno de mobilisation al Pentagon in Washington. Cata saison de Natal, io
vadeva a Washington pro duo septimanas pro servir al Officina pro le
Recerca de Personal, sovente in un differente subgruppo, pro le contacto
con differente aspectos del recerca militar. In 1970, io decideva a retirar
me del Reservas, ben que io reteneva mi commission como capitano. Fortunate-
mente nostre pais ha evite un guerra in que io esseva de novo requirite a
servir.
Io cognosce que nostre generales oppone le tractato pro prohibir le minas.
Nostre armea ora usa minas sophisticate, que pote esser automaticamente
destruite o inactivate post un certe passage de tempore. Io es certe que
vostre pais pote facer los tam ben. Infortunatemente multe milliardes de
minas ha essite lassate super le campos de battalia per tote le mundo, e
istos es le minas primitive que remane periculose generationes post lor
deposito. In mi opinion, istos es lo que on debe prohibir. Mais paises
con technologias minus sophisticate que le nostre va rejicer un tal accordo,
pro que in isto nos ha le avantage.
Stan Mulaik
|
