Ante alicun minutas io ha recipite le notification ex nostre servitor-lista
"Maelstrom" que un de nostre membros ha quitate le gruppo.  (In mi rolo de
magister-lista io recipe tal notificationes quando personas junge se o
quita.)

Naturalmente, io non sape con certitude le causa del partita in iste caso,
sed io suspecta.  Anto duo dies le membro ha facite su prime contribution
al lista per inviar nos un poema que ille habeva traducite.   Le poema (e
le traduction) me placeva MULTO.  Mais, como si sovente in mi proprie
scripturas interlinguan, le traduction conteneva alicun errores.  Un altere
membro ha inviate un message con correctiones e suggestiones.  Io suspecta
que le membro partite videva le correctiones como critica, sentiva se mal e
ille decideva partir.

Guai!    Le poema era vermente preciose. Anque le suggestiones era
completemente correcte e date con politessa.    Cata un de nos face
errores--es inevitabile.   E normalmente nos vole meliorar nos per esser
informate super nostre imperfectiones.  Mais, al altere latere, le esser
human es sensibile e legeremente ferite per critica.  Que facer in tal
casos?

Permitte me a proponer un solution possibile.  Que nos in le futuro non
face publicamente ulle critica hic in le lista.  Que omne critica,
correctiones, suggestiones sia facite PRIVATEMENTE per posta-E adressate
solmente al scriptor e NON AL LISTA.  Si le recipiente del critica vole,
ille ipse poterea presentar le critica recipite per su obra al lista pro
discussion general.

Que vos pensa?

-- frank