d[030503] x[Kiviaho Allan] z[KivA-353gk]
s[Le anima de Toma Macovei se ha levate al celo]
+ + + + + + + + + + + + + + + + + + + + + + + + +
"Le anima de Toma Macovei se ha levate al celo!"
+ + + + + + + + + + + + + + + + + + + + + + + + +
Car interlinguistas,
Con iste parolas Simona Sunel, la secretaria del
Association Romanian pro Interlingua, annunciava le
morte del professor Toma Macovei, un de plus
enthusiastic e loyal interlinguistas del mundo.
Professor Macovei nasceva le 1911-07-23 a village
Ghergheasa e ille moriva le 2003-04-25, assi in le
etate de 91 annos e 9 menses.
Ille era un scriptor multo productive e le plus
grande obras sue son ancora non-publicate. Un de illos
es su autobiographia.
Ingvar Stenström scribeva le 2003-04-27 - non sapente
que Toma Macovei habeva morite 2 dies anteriormente:
"Io desirarea tosto vider le autobiographia de Toma
Macovei, qui ha describite su longe vita (i.a. como
officiero de partisanos in Romania), in un manuscripto
de 200 paginas."
Io ha duo libros de Toma Macovei:
Toma Macovei
MISCELLANEA. Insolite creationes spiritual.
Illustrationes per Henrik Breinstrup.
Servicio de Libros UMI. Beekbergen, Nederland 1996.
101 pp. ISBN 90-71196-40-2
"In un forma anecdotic e informative Toma Macovei da su
contribution pro inricchir le cultura general del juvenes e
plus avantiates in etate.
'Miscellanea' es un parve encyclopedia del spiritualitate human,
narrate in un maniera charmante e capturante. Le libro presenta
textos pro inspiration, information e intertenimento."
Toma Macovei
Le Vita Anecdotic del Homines Illustre.
Servicio de Libros UMI. Beekbergen, Nederland 1987.
92 pp. ISBN 90-71196-11-9
"Narra in un maniera capturante e inspirante le historia del
vita de plure famose homines historic. Le biographias son plen
de anecdotas super iste personas illustre."
Le contento de iste libro:
Homero - un vita legendari
Desiderius Erasmus Rotterdamus - le perennitate del ideas
generose
Voltaire - pur intelligentia que transforma le ira in burla
Napoleon Bonaparte - le solution fortunate del vacillation
initial
Ion Creanga - le Homero de Romania
Mark Twain - "rege del allegressa" ma anque portator de un
message humanistic
Ion Luca Caragiale - un spectaculo exceptional
Thomas Alva Edison - le genio non es un miraculo
George Bernard Shaw - le humor es satira social, non simple
joco de parolas
Invocation a Aphrodite
Re le spirito del societate Junimea (Juventute)
Al initio de iste libro es un autobiographia de Toma Macovei:
/ / / / / / / / / / / / / / / / / / / / / / / / / / / / / / / /
AUTOBIOGRAPHIA
Io ha nascite le 23 julio 1911 in un village del campania
romanian (Ghergheasa, districto R-sarat), ex un familia de
paisanos povre. Mi parentes era minus instruite, ma
integralmente san, honeste e diligente. Habente un ganio
modeste e plure infantes, illes laborava penosemente, ma,
cetero, menava un existentia calme e digne. In respecto pro le
virtutes ancestral e per un ver culto pro le cultura del agro.
Mi prime contacto con le schola, in le village natal, era pro
me un ver revelation. Le libro appareva a me como le meravilia
del maravilias. Per su miraculose litteras, io discoperiva un
mundo a parte, multo interessante e fascinantenebte belle.
Finiente con brio le schola primari, io obteneva un successo
surprendente al examine de admission in le Liceo militar de
Cernauti (1924), ubi le mantenimento era gratuite. Semper le
prime in mi classe, io finiva per optime resultatos le schola
secundari, inclusive le baccalaureato (1931). Sequeva duo annos
de dressage in le Schola militar pro officieros active de
infanteria de Bucuresti e Sibiu. Hic io non brillava plus, nam
mi natura pacibile e humanitari non congrueva del toto le
apprentissage del arte de occider "heroicamente" nostre fratres
de altere gentes qui non adhere voluntarimente a nostre
conception de vita. Tamen, per fortia de necessitate, io
deveniva sublocotenente (1933), laborava dum 14 annos como
officiero active in le armea, luctava pro liberation de mi pais
durante le guerra, ubi io era vulnerate e decorate con le
ordine "Stella de Romania" pro "factos de armas contra Germania
fascista".
[Iste texto era scribite durante le era del tyrannia de
Ceaucescu. Nota ben que Toma Macovei faceva le major
parte de su carriera militar in le armea del Regno de
Romania e que le armea romanian luctava contra le
"Germania fascista" solmente post augusto 1944. Sed un
question interessante: An Toma Macovei luctava como
partisano contra le regime de Antonescu durante 1941-44?
-- Allan K]
"Inter arma silent musae", remarcava le antiquos secundo
Cicero. Io constatava que in le armea suffre etiam le
preoccupationes cultural insigne. Post le baccalaureato, mi
plus calorose desiro era semper illo de continuar mi studios in
le inseniamento superior. Sed longe tempore mi commandantes non
lo permitteva. A pena in 1941 io succedeva inscriber me al
Facultate de Philosophia e Litteras del Universitate Cluj-Sibiu
e, in 1945, io obteneva le licentia in philosophia e absolveva
le Seminario pedagogic universitari in philosophia e jure. In
le anno sequente io anque succedeva al examine de capacitate
pro le professores secundari in philosophia e jure.
Le mesme anno (1946), desirante entrar in le inseniamento, io
passava, secundo mi demanda, in le quadro disponibile del armea
e, post un anno, io era passate de officio in reserva con le
grado de major.
Io doceva postea in le inseniamento: philosophia, lingua
romanian e anque alicun linguas estranier usque in 1973 quando
io era pensionate.
Io viagiava relativemente multo, in quasi le integre Europa, de
Roma, Paris, Haga, Varsovia a Moscova e Leningrad, e in
levante, de Constantinopole e Athenas a Alexandria, Haifa e
Beiruth.
Mi sposa era etiam professora, de sorta que, interrogate un
vice si io ha collaborate con illa, io poteva responder como un
celebre humorista: "Certo, nam al minus nos ha insimul duo
infantes (filio e filia), qui ora son ingenieros ambes."
In interlinguistica io initiava me per le intermedio de
esperanto, le qual io comenciava studiar autodidactemente desde
le autumno 1957. Pois io profundava mi cognoscentias per
correspondentia, lecturas e participation al incontros
esperantista, mesmo a un Congresso Universal de Esperanto
(Sofia, 1963). Un vintena de mi essayos in esperanto appareva
in differente revistas esperantista. Desde 1975 io es
inregistrate "mondcivitano" del secretariato in Nimes
(Francia). Ja de longe tempore io es MA de UEA e membro
regulate de IUEF (Sofia).
Con interlingua, io ha facite cognoscentia in 1982 per sr.
Lucian Georgescu, le ex-representante de nostre pais a
"Currero", qui me inviava un parve dictionario e un curso
elementari improvisate de ille. Secundo su consilio,
scribente pois al regrettate Ric Berger (Suissa), ille
extraordinarimente generose interlinguista inviava me numeros
del "Revista de Interlingua" e del "Encyclopedia de
Interlingua".
A su tempore, esperanto me enthusiasmava. In comparation con le
linguas national, illo appareva me como le solution optime de
un lingua auxiliar international e io non comprendeva proque
omne statos non lo adoptava. Sed ecce que existe solutiones
ancora plus adequate. Ora io es convincite que interlingua es
multo plus convenibile a complir iste rolo que esperanto. Le
redaction de un littera o de un essayo in iste lingua constitue
un agradabile joco intellectual pro me.
Valorose materiales in interlingua inviava me anque le seniores
Bent Andersen e Frank Esterhill. Istos dava me le possibilitate
de profundar mi cognoscentias e de rediger mi prime essayos in
iste meraviliose lingua, le quales desde 1984 appareva in
"Heraldo de Interlingua". Secundo mi demanda io recipe anque le
magazin "Currero".
On litteratura e historia place a me super toto le creationes
humoristic: anecdotas, legendas, burlas, pensatas etc. Le plus
spiritual io usa in mi essayos. Sed mi plus placente e
appreciate obra sera, certo, "Le vita anecdotic del homines
illustre", biographias basate sur le plus spiritual
historiettas humoristic que io incontrava.
\ \ \ \ \ \ \ \ \ \ \ \ \ \ \ \ \ \ \ \ \ \ \ \ \ \ \ \ \ \ \ \
Altere libros de Toma Macovei:
Toma Macovei
Ab le auro spiritual del scena e del schermo.
Servicio de Libros UMI. Beekbergen, Nederland 1993. 92 pp.
Illustrate per Henrik Breinstrup
ISBN 90-71196-28-3
"Isto es un parve encyclopedia del plus spiritual burlas,
anecdotas, legendas, curiositates e observationes de spirito,
super toto ab le vita del homines illustre, ma anque ab le vita
quotidian, un presentation variate e original del brillante
joieles spiritual ab tote le tempores e locos.
'Un bon riso e un longe somno es le optime curas in le libro
del medico.' Assi dice un proverbio ab Irlanda. E proque non
mantener su sanitate per combinar agradabile lectura con bon
risos?"
Toma Macovei
Joieles spiritual.
Servicio de Libros UMI. Beekbergen, Nederland 1995. 96 pp.
Illustrate per Henrik Breinstrup
ISBN 90-71196-35-6
"Un bon burla charma nostre spirito equalmente como un joiel.
Iste parve encyclopedia del plus spiritual burlas, anecdotas,
legendas, curiositates e observationes es un presentation
variate e original del joieles spiritual ab tote le tempores e
locos. Al fin il ha duo essayos de philosophia politic,
condimentate per facetias e anecdotas."
- - -
Omne iste libros son obtenibile ab le Servicio de Libros UMI,
http://www.interlingua.com/libros/index.html
- - -
Honor a un officiero, humanista, gentilhomine e un grande
interlinguista, Toma Macovei!
Io me profundemente regretta que io non ha incontrate
prof. Macovei personalmente.
Allan Kiviaho
=============================================
Kiviaho Allan
SILY - Suomen Interlinguayhdistys ry.
FILF - Föreningen för Interlingua i Finland
AFIL - Association Finlandese pro Interlingua
Kivimäentie 16 E. FIN-01620 VANTAA. Finlandia
[log in to unmask]
http://www.kolumbus.fi/allkiv
http://www.interlingua.dk/2001.htm
http://www.interlingua.com
Tel. + 358 - 09 - 898 720
GSM + 358 - 050 - 3616 759
=============================================
|
