Erik,
   Monterey es un loco belle.  Illo es locate al base de un peninsula
que se projice in le mar e crea un baio justo como le pollice de tu
mano derecte forma un inclausura con le resto de tu mano e digitos.
Le terra se leva a circa 30 metros in alto super le mar in le
peninsula.

   Le terra ha forrestas de pinos e eucalypto, e al sud de Monterey,
al latere del mar le terra se leva multo plus e forma alte
precipitios super le mar.  A vices il ha extrusiones de roccas
secundo le margine del mar al base del precipitios que ha
resistite le erosion del mar, e in altere locos plagias de arena.
Le strata nro. 1 seque le margine del mar, a vices 30 - 50 metros
in alto, e on vide un vista meraviliose.  On pote parcar su
automobile a varie sitos al latere del strato, pro admirar le
vista del mar e le undas que se batta contra le roccas e
crea explosiones de spuma.

   Le participantes de mi societate de statisticos psychologic
habeva vadite le secunde nocte a un restaurante a "Rocky Point"
(Puncto Roccose), que es super un precipitio super le mar.
Nos arrivava justo ante que le sol se poneva in le mar al
west.  Le lumine esseva tranquilante.  Nos stava admirante
le spuma, le undas, e le precipitios al sud, e le sol,
rubie in le west como illo se disappare a basso del horizonte.

   Durante que io me sedeva 9 horas cata die in le meeting,
mi sposa habeva explorate le region circa le hotel, que
includeva "Cannery Row", que hodie ha devenite un sito pro
touristas, con multe restaurantes, botetcas de arte e
joileria, confecterias, e museos.  Finalmente le secunde
die io decideva que le topicos discutite non es particularmente
pertinente a mi interesses e io usava duo horas pro explorar
alcun sitos presso le hotel in que nostre reunion occurreva.
Io visitava le Casa de Doanas que esseva le prime edificio
governamental in le region de California, que esseva initialmente
un colonia de Espania. Le espanioles habeva discoperite le
baio e illes establiva un mission del ecclesia catholic
pro convertir le aborigines.  Illes construeva le casa
de doanas pro fortiar tote naves a registrar lor benes
e pagar le doanas ante que illes vadeva al varie portos del
colonia.

   Le "Cannery Row" esseva plus recente, post que le
americanos habeva discoperite que le baio es plen de
pisce.  Varie fabricas de conservas esseva constructe al
latere del mar pro reciper e processar le pisce portate
per naves de piscatores.  Istos esseva crudemente in un
linea, assi le anglese "Cannery Row", con cata fabrica
al latere de alteres.  Hodie le fabricas ha quitate, e
multe del edificios ha essite convertite al varie
restaurantes e botecas.  Mais le quai super le qual
esseva constructe iste botecas es equalmente le sito
de perchas de laros e pelicanos.  Quando io ambulava
per un allee inter duo botecas pro vider le mar al
fin del quai, io torna un angulo e videva super le tecto
de un restaurante dozenas de pelicanos e laros.  A un
restaurante ubi plure de nos habeva vadite pro dinner,
le fenestra facie le mar e un cornice al base del
fenestra esseva le location de plure pelicanos que tu
poteva toccate si il non habeva le vitro del fenestra.
Le pelicanos ignorava nos, secur que nos non pote
toccar les.

  Io visitava un parve museo maritime presso le
Casa de Doanas.  Illo contineva antique cannones,
sextantes, e naves constructe in bottilias.  E il
habeva le lente de un pharo con le motor horologic
que tornava lo.  Le motor debeva remontar se cata
4 horas del nocte.

  Un facto que io non sapeva ante isto esseva que
Robert Lewis Stevenson habitava Monterey pro un
anno.  Ille usava le loco pro crear le atmosphero
de su libro "Treasure Island"  (Insula de Tresor).

  Tote le edificios esseva in le stylo espaniol.
Le commission de zonification esseva multo
potente in fortiar un uniformitate de architectura.

  Un altere cosa:  A Monterey es un pista pro
le cursas de automobiles del classe de Indianapolis.
Le fin del septimana quando nos esseva a la il
habeva le final cursa del anno de iste classe
de automobiles al Pista de Laguna Seca.  Il
esseva un opportunitate pro le mercantos e le
citate pro accumular le moneta!

  Io spera que isto esseva un conto de interesse a
te.

Stan