861-5A KivA
da[980602]
ab[Allan Kiviaho <[log in to unmask]>]
su[ROMANI SUMUS!]
-------------
ROMANI SUMUS!
-------------
Usa Courier 10, per favor.
Estimate interlinguistas!
Hic un concepto pro littera de propaganda re Interlingua
a personas eminente.
Io absolutemente non crede a idea del littera breve e
neutral. Nos ha adversarios formidabile:
- LETHARGIA
- APATHIA
- IGNORANTIA
- ANTIPATHIA, ETIAM AGGRESSIVITATE contra essayos de
substituer linguas national con linguas auxiliar in
cooperation international (Quasi le tote cadre de
inseniatores de linguas considera nos como inimicos
mortal!)
Nos confronta POLITICOS europee e national! In lor mundo
un proprie portion de DEMAGOGIA es necessari.
Nostre littera de propaganda non debe esser
tepide e academic, il debe esser
CALIDE e DEMAGOGIC!
Nostre sol sperantia pro un precoce acceptantia del
Interlingua es:
1. A provar le avantages e necessitates del Interlingua
como factor economic in le futuro de Europa
2. Le passiones paneuropee. Europatriotismo!
Euroenthusiasmo!
*********************************************************
Nos debe convince un sufficiente numero del personas
eminente e partitos politic super le necessitate del
Interlingua como un lingua auxiliar commun de Europa.
Il es probabilemente le sol via al successo rapide.
Forsan il ha anque un tertie via: Le successo partial.
Le parve paises europee poterea formar un blocco
lingual que se banda a usar interlingua in omne
occasiones intereuropee. Le membros "natural" pote
esser: Le statos de Scandinavia, Finlandia, tote
slavic statos (includente Russia que certo non ama le
idea de hegemonia de germano, francese o anglese e
russo ipse ha nulle chance de devenir un lingua
international - inter alteres pro rationes historic
e politic), Grecia, Turchia, Albania. Il esserea
natural que anque le gruppo del nationes romanic
poterea acceptar interlingua como lingua auxiliar
commun (Perque non?).
In isto lucta le stato de Germania es multissimo
importante. Germania es ja le plus potente stato de
Europa. Il non es totalmente impossibile que Germania
poterea devenir interessate de interlingua perque
Germania non ama le idea de francese e anglese a par
con germano in affaires europee. Naturalmente Germania
aspira a hegemonia lingual (e economic) in su
"satellitos", como Polonia, Czechia, le statos de
Baltico e Balkan. Le de facto satellitos de Germania
deberea resister le hegemonia lingual de germano,
benque il es quasi inutile (resister le hegemonia
economic es totalmente inutile).
Un idea que me place multo es le idea de Liga de Hansa,
le reviventia de tal confederation potente del medievo,
que poterea consiste de Germania, Polonia, Kaliningrad,
Lithuania, Latvia, Estonia, le area major de Sankt
Peterburg, Finlandia, Svedia e Danmark. Le capital del
Liga de Hansa esserea, naturalmente, Lübeck. Le elemento
russe poterea diminuer le pression de germano. Latino
era un lingua importante in le Liga de Hansa. In
principio del 18e seculo le grande rege del Svedia,
Carolus XII, parlava latino, non svedese.
Exhortation:
Le lingua del Mare Balticum sia ni germano, ni russo, ni
anglese, ni svedese.
Le lingua del Mare Balticum sia latino, latino moderne,
Interlingua!
Quando io scribe isto lineas, il es sabbato 980530 e io
sede con mi marita in le silva in nostre cabino de fin
del septimana. Nostre filio vadeva heri a Tallinn, le
capital de Estonia. Ille iva con un hydroplano (Made in
the USSR!) ab Helsinki le 21:00 horas e era in Tallinn
postea 1.5 horas! Tallinn es multo hanseatic, multo
medieval e multo latin! Il ha interessante medieval
restaurantes ubique ensembles medieval performa cantos
latin! Mi filio ha totalmente perdite su corde a Tallinn,
isto era su tertie viage a Tallinn in breve tempore e le
quarte postea le liberation del Estonia. In Tallinn
studia duo amicos de nostre filio, su collegas studentes
de Ċbo Akademi. Nostre filio habera 30 annos post 10
dies e nostre tote familia ha planate a vader a Tallinn.
*********************************************************
Si nos non habera successo hodie in le era del euphoria
europee, nos ha un via longe e difficile a vader ("Le
marcha longe de Mao Dze Dong", ma le marcha victoriose).
Il es bon tactica non mentionar esperanto e altere linguas
construite del toto, i.e. "interlingua non es un lingua
construite o artificial".
Ma a prsonas qui jam son infectate per le bacteria de
Esperanto, il es necesse a provar le superioritate
fracassante de Interlingua super Esperanto. Interlingua es
un lingua PUR e NOBILE, Esperanto es IMPUR e BASTARDIC.
Nos debe provar que Interlingua era developpate per un
organisation potente con linguisticos eminente e
institutiones famose. Illo non es un producto de un parve
gruppo de enthusiastic dilettantes.
Nostre inimico principal, forsan le sol inimico, es
anglese in Europa. Nos debe provar que anglese es un
multo mal alternativo pro Europa como un lingua auxiliar
commun. Ma le USA es anque nostre alliato natural in le
lucta pro superviventia in le futuro e le membro principal
in NATO. Nos europeos debe ha fluentia etiam in anglese,
non solmente a causa del USA per se ma perque le
"imperialismo american" in brancas del technologia,
economia e cultura conquera un grande parte del mundo.
Si anglese devenira le lingua auxiliar principal in Europa,
Interlingua perde su raison d'etre.
Car amicos! Forsan tal interlinguistas qui crede a
"mi schola" de demagogia e litteras longe lege isto texto e
face correctiones e perfectionamentos o modificationes
necessari in varie paises. Le litteras breve son
probabilemente INUTILE perque le plus del destinatarios
audi de Interlingua a prime vice.
Nostre litteras de propaganda, longe o breve, debe devenir
traducite al linguas national in paises correspondente.
Nos debe contactar le associationes de Interlingua in tal
paises. (Ma, como Kjell Rehnstrom scribeva, il es sovente
proprie scriber solmente in interlingua. Il es un prova
reassecurante que on pote comprender interlingua a prime
vista).
Io traducera isto texto a finnese e invia lo a personas
importante in Finlandia.
EUGE! EUGE! EUGE!
Allan Kiviaho
Finlandia
|
