Ben venite de novo a interlng, Ensjo.  Como esseva vostre curso?

Io anque es triste e consternate que Anne ha decidite partir de
interlng. Vos pote leger le archivos pro discoperir le evenimentos
que subitemente ha alienate la. Io ha sperate que per discuter le
question que ha dividite nos, nos poterea arriver a un puncto ubi
nos tolera qualcunque differentias de opinion inter nos. Illa esseva
in le processo de explicar in plus detalio su position, quando illa
decideva a abandonar le effortio e quitava interlng.  In le interim io
ha essayate a leger certe libros super le linguistica moderne pro
discoperir le origine de su observation que le hypothese de Sapir-Whorf
es racialistic.  Io opina que isto es mermente le rhetorico de su schola
del linguistica, le chomskyanos, qui debe superar le schola relativistic
de Boas-Sapir-Whorf pro vincer in lor argumento que le homine ha un
"instincto" pro un lingua o grammatica universal que existe sub cata
lingua specific.  Ben que il es difficile comprehender como un movimento,
que argue que tote es relative inter culturas e que necun cultura es
melior que alcun altere, pote esser racialistic, io opina que isto possibile-
mente es le position de certe professores de Anne (io non sape con
certitude). Lor rationamento possibilemente es que Whorf ha exaggerate
le factos linguistic pro arguer que cata lingua provide le homine con un
differente maniera de comprehender le mundo, e in certe casos le
differentias inter culturas e psychologias de certe populos pote esser
grande.  Le chomskyanos possibilemente argue que isto face certe gruppos pare
estranie e bizarre, provocante le reaction negative de nostre culturas
a illes, assi, proque iste culturas es sovente de racias o populos
exotic, illo provoca le racialismo.  Isto es in mi opinion un argumento
rhetoric que misrepresenta le attitudes de Sapir e Whorf, mais io pote
acceptar isto como le rhetorico de debattos inter academicos, e io non
senti offendite per Anne qui fidelmente exprime le ideas de su schola,
si illa es volente a leger independentemente le obras de Sapir e Whorf pro
illa mesme pro decider si iste accusation contra illes es juste. Intertanto,
io es inclinate a acceptar altere aspectos del chomskyan position, que il
ha generalmente un "instincto" pro le lingua que es universal, ben que
io possibilemente va cercar un position minus extreme, que certe
disveloppamentos in le evolution linguistic ha facite le humanitate
multo differente in certe respectos que nostre ancestres. Mais isto es
toto alque super le qual nos pote esser de accordo a esser in disaccordo.

Assi, io vole que illa se retorna a interlng. Potesser vos pote persuader
la a facer lo.

Stan Mulaik