Io sovente usa le sequente texto pro responder a questiones super
interlingua. Io pensa que alteres va trovar utile. Sia libere de
facer emendamentos.
>>>>>>>>>>>>>>>>>>>>>>
Interlingua es le producto de recercas conducite per le
Association pro le Lingua Auxiliar International (ALAI),
fundate per Dave e Alice Morris in 1924. Le objecto del
association esseva a investigar le necessitate de un lingua
auxiliar international. Post 1933 ALAI assemblava philologos
de reputation international pro laborar super le
disveloppamento de un lingua auxiliar international. Post
recercas preliminari, labor super le disveloppamento del lingua
mesme commenciava in 1936 sub le direction de William E.
Collinson e E. Clark Stillman al Universitate de Liverpool, con
le recerca financiate per un stipendio del Fundation Rockfeller.
Quando le Guerra Mundial II commenciava, le recercas esseva
movite a Nove York in 1939 sub le direction de Stillman. In
1943 un preliminari studio per Stillman e Dr. Alexander Gode
describeva un conception de un lingua auxiliar international
totalmente natural basate super un standardisation del parolas
international in le gruppo angloromance del linguas europee.
Post 1943, quando Stillman quitava ALAI a entrar se a in le
servicio governamental, Dr. Gode assumeva temporarimente le
directorato del recerca de ALAI durante que ille esseva anque
le Redactor de Libros de Referentia a T. Y. Crowell Co.. In 1946
ALAI ingagiava Dr. Andre Martinet del Sorbonne a continuar le
labor a Nove York, mais quando Martinet se jungeva le facultate
del Universitate Columbia in 1948, Dr. Gode esseva ingagiate a
complir le disveloppamento del lingua auxiliar international.
Le recercas esseva finalisate per le production in 1951 de un
interlingua-anglese dictionario e un grammatica de
interlingua.
Le resultante lingua es un standardisation del elementos
international in le linguas anglese, francese, italiano,
espaniol/portugese, germano e russe. Un parola que occurre con
similar forma e signification in al minus tres de iste linguas
es eligibile entrar se a in le vocabulario international de
interlingua. Le forma del parola acceptate a in le vocabulario
es le prototypo, o historic o theoretic, commun al variantes in
le linguas a base, con le variantes deviante se del prototypo
secundo leges etymologic characteristic del evolution del
linguas in que se trova. Le prototypo es anque determinate per
le prototypo del thema trovate in serie derivational in iste
linguas. De plus le principio del prototypo diceva que radices e
affixos debe esser regular (ben que on recognosce le existentia
in latino del duple themas in serie derivational como in casos
como trahe-/tract-, vid-/vis-, face-/fact-, dic-/dict-, etc.
proque istos es conservate in tote le linguas a base). Le
grammatica es basate super le idea que alicun characteristica
grammatic non trovate in tote le linguas a base es discargate.
Assi le interlingua ha necun genere grammatic pro
substantivos e adjectivos, necun inflectiones de persona pro le
verbo, e regularitate del formas del tempores del verbo basate
super tres serie de verbos (-ar, -er, -ir) (con un parve minor
exception pro le verbos de "esser", "haber", "vader": "es", "ha",
"va", in le tempore presente).
Un pagina initial in le rete mundial super interlingua es a
http://www.naz.com/personal/interlng
A iste pagina vos pote trovar ligamines a un dictionario
anglese-interlingua, un breve curso de 8 lectiones super le
grammatica, e numerose altere materias de lectura.
Informationes e libros super interlingua in le Statos Unite es
obtenibile de
Interlingua Institute
332 Bleecker Street, #G34
New York, NY 10014
In Europa:
Servicio de Libros de UMI
Zonnegloren 30
NL-7361 TL Beekbergen
Nederland
Interlingua ha essite usate in scholas secundari in Sveda como
un introduction al vocabulario international e le linguas
romance. Studentes pote advantiar se post un anno a un nivello
de competentia que sovente es obtenite post solmente tres
annos con linguas romance como le espaniol e le francese. Tal
studentes de interlingua ha monstrate de plus post un anno le
capacitate de traducer accuratemente textos del espaniol,
italiano, o francese que mesmo studentes habente studiate in
loco iste linguas durante un anno non poteva traducer. Le
lingua es un medio excellente pro parlantes del varie linguas a
base pro apprender le etymologia general de lor linguas. Illo es
un excellente ponte pro communicar trans bordos inter
parlantes del linguas a base, specialmente anglese e le linguas
romance. On qui sape le interlingua sovente pote comprehender
le francese o espaniol o italian, durante que parlantes de iste
linguas facilemente comprehende le interlingua a prime vista.
On anque pote conciper interlingua como un variante moderne
del lingua latin. Illo conserva multe formas del latino, mais
con un grammatica simple secundo le romance. Illo es un forma
de anglo-romance standardisate.
Nos ha observate plure personas qui jam sapeva le latino e
plure linguas del gruppo anglo-romance e qui poteva apprender
le grammatica e scriber interlingua quasi fluentemente post
solmente un die del studio! Pro alteres sovente un septimana
es un bon commenciamento.
Suggerite altere usos de interlingua: como un lingua commun in
firmas international. Pro visitar gruppos de novas in le interrete
devotate al paises o culturas romance. Pro parlar con le populo
in paises romance quando on feria in sud europa. Lingua auxiliar
de europa, del mundo occidental?
Il ha un servitor de lista in le interrete ubi se parla le
interlingua. Pro junger se de novo al gruppo invia le message
sequente a:
[log in to unmask]
subscribe interlng vostre nomine
Del servitor de St. John's University vos recipera un
verification. Vos debe responder con le message sequente a:
[log in to unmask]
ok
pro communicar un message al gruppo,
--> invia lo a iste adresse:
[log in to unmask]
pro discontinuar vostre participation in le gruppo
--> invia le message sequente a:
[log in to unmask]
signoff vostre nomine
>>>>>>>>>>>>>>>
Stan Mulaik
|
