At 17:57 +0300 16-04-2009, Allan Kiviaho wrote:
>Pro facer interlingua plus cognite inter le publica
>grande, nos debe facer agitation e propaganda in foros
>foras de illos de interlingua, como AUXLANG e CONLANG,
>proque nostre cadres son quasi exhaurite.
In mi opinion iste strategia non es effective. Le listas supra
mentionate es populate per adherentes de varie linguas auxiliar e/o
construite, e multes de illos es le sol adherentes de linguas de lor
proprie creation; le sol cosa que totes de illes ha in commun es le
immutabilitate de lor opiniones. Nulle persona essera convincite per
agitation suscitate in iste locos; le sol resultato essera
discussiones acerbe e sin fructo.
No, io pensa que le propaganda debe diriger se verso le publico
general -- le publico que nunquam ha audite de interlingua. In ultra
io pensa que on debe basar se, non super le grande historia de
interlingua (le qual es interessante solmente a pauc personas), ma
super argumentos rational e utilitari pro interlingua, argumentos
dirigite non verso le passato ma verso le futuro.
Qual argumentos rational e utilitari? Per exemplo:
* Que existe le realitate de un vocabulario de scientia e
technologia, commun al grande majoritate del linguas del mundo.
* Que existe un interlingua concrete, scribite e parlate, basate
super e consistente de iste vocabulario scientific international, e
modulate in un grammatica angloromanic simplificate, de modo que
interlingua es multo plus facile a apprender e usar que omne lingua
national.
* Que iste lingua, proque illo es basate super le realitate del
vocabulario international, es comprensibile sin studio previe a
forsan un milliardo de gente in tote le mundo.
* Que interlingua es comprendite sin studio previe in le areas ubi se
parla linguas latin, e ubi le cognoscentia del anglese es ancora rar
e insufficiente; que interlingua es ergo un instrumento complementari
con grande utilitate mesmo in iste mundo dominate per le anglese.
* Que interlingua, trans le annos, se ha disveloppate in un lingua
vive, con un communitate active de parlatores e scriptores,
litteratura publicate, etc. -- que illo ha transcendite le stadio de
un experimento de laboratorio e hodie es un lingua real,
immediatemente, e avantagiosemente, usabile.
E on poterea mesmo facer un argumento politic, si on pensa que su
audientia particular lo acceptarea:
* Que interlingua es un medio de communication culturalmente neutral,
cuje uso pote esser un sorta de antidoto contra le imposition del
cultura anglosaxone super le resto del mundo.
Io pensa que existe excellente argumentos pro apprender interlingua
pro uso active, sin perder se in propaganda.
- Martijn
--
Archivos e disabonar: http://listserv.icors.org/archives/INTERLNG.html
|
