50 annos retro le Tractato de Roma esseva signate. Isto marcava le 
initio del plus ambitiose sonio del historia human e le fin de un longe, 
insensate e multo dolorose periodo de guerras e destructiones. Post 1750 
annos (le edicto de Caracalla, que confereva le derectos de citatanos a 
totes le habitantes del Imperio, ab Britannia usque a Romania, es del 
anno 212, si io memora ben) le europees initiava a revenir in lor alveo 
natural.

Post 50 annos, nemo in Europa pote non mesmo imaginar un vita 
circumscripte al proprie pais: cata die nos parla o viagia o labora con 
citatanos de altere paises de Europa, nostre filios studia in altere 
paises de Europa e sovente establi relationes affective con personas de 
altere paises de Europa.
Tote le Paises que adhereva al Union Europee, anque le plus povre e 
ruinate per le occupation militar, tosto ameliorava su economia e 
deveniva un tigre. Le homines es exceptional si ha un perspectiva de 
libertate, e terribile si non ha sperantia.

Isto hodie es natural, como es natural rationar in euro. In campo 
international, como europee nos es citatanos del tertie communitate al 
mundo pro population e del prime pro Producto Interne Brute, como 
citatanos - e.g. - italian nos es nihil.
Ma - forsan pro iste ration - le iuvenes perdeva de vista le spirito 
initial del patres fundator. Le nove generationes debe completar le 
designo original e realizar le union politic. Un auxilio non secundari 
es le adoption de un lingua commun, que non pote esser le lingua matre 
de un parte de citatanos, pro non generar injuste rentas de position. 
Pro iste ration Interlingua debe prosequer a NON esser un lingua 
pan-romanic. Si possibile, io accentuarea le peso del linguas germanic, 
e.g. reimplaciante le particulas latin plus rare con illos anglese o 
similar.

Finalmente, tote nos debe incoragiar e sustener le politicos europeiste, 
como seniora Angela Merkel, qui in iste momento es tentante de relancear 
le processo constitutive europee e le proposito de moratorio del pena de 
morte al ONU. Nos besonia rapidemente de un Constitution, de un 
Parlamento que face leges, de un Governamento que los applica, de un 
armea que nos defende. E dicente "nos" io significa: tote le personas 
democratic del mundo. In le plus remote loco del mundo, qui es private 
de su derectos fundamental debe saper que ille ha un grande e potente 
defensor qui non es disponibile a facer compromissos con despotas, 
dictatores, terroristas e fanaticos religiose.

robocap
europee tout court

--
Archivos e disabonar: http://listserv.icors.org/archives/INTERLNG.html